Shillong, Risaw 30
U Myntri ba khmih ïa ka tnad ka koit ka khiah ka Sorkar Jylla, u Bah Wailadmiki Shylla u la ban jur ïa ka jingdonkam ban pynkylla ïa ka rukom treikam ban ïaleh pyrshah halor ka jingshah ñiewbeiñ ha kaba ïadei bad ka jingpang HIV/AIDS ha ka Jylla.
U Myntri u la kren ïa kine ki kyntien haba kren halor ka jingbun ki briew kiba ïoh ïa ka jingpang AIDS kaba shyrkhei hapoh ka Jylla.
U Bah Wailadmiki u la pynpaw ba ka jingshah ñiewbeiñ halor ka jingpang HIV/AIDS, ka pynkhang lad ïa ki briew ba kin wan shakhmat ban phah sumar ne wan test.
U la kdew ruh halor kawei ka jingjia kaba la jia ïa u wei u khynnah skul u ba la shah beh skul hadien ba la lap ba ka kmie jong u tei u khynnah skul ka don ïa ka jingpang HIV.
“Ngi hap ban pyrkhat bad sngewthuh ïa ki jingeh kiba ki ïa kynduh,” la ong u Myntri.
Ban weng ïa kum kine ki jingeh, u Bah Wailadmiki u la ai jingmut ban pynlpong shuh shuh ïa ki prokram pynsngewthuh bad ban pynleit jingmut ym tang ïa ki nongpang HIV hynrei sha ki paidbah baroh.
“Ngi donkam ban ai ïa ki jingpynshai paidbah ne ki awareness prokram sha ki paidbah, khnang ban weng ïa ki jingeh,” u la ong
U Myntri u la ong ruh ba kaba donkam ka long ban pynlylla ïa ka rukom treikam ban ïaleh pyrshah ïa ka jingpang HIV/AIDS, da kaba ong ba tang ban ai pisa kam pat biang.
U la kyntu ruh ïa ki MLA ban trei ryngkat ban pynsaphriang lyngba ki awareness prokram ban pynsngewthuh ïa ki paidbah ba kin mih shakhmat ban phah test.
U la ai jingmut ba dei ban pynshlur ïa ki briew kiba don ïa ka jingpang HIV/AIDS ban wan shakhmat ban ïasam ïa ki jingshem jong ki ban pynsngewthuh bad pynduna ïa ka jingshah ñiewbeiñ.
U Myntri u la pynpaw ruh ïa ka jingdonkam ban pyntip sha ki briew ba ka jingpang HIV/AIDS kam dei ka jingpynshitom ïap bad ba da ka jingsumar kaba biang, ki briew ki lah ban im ka jingim kaba don burom.
“Ngi donkam ban thaw ïa ka jingsngewthuh ba ka don ka lad ban sumar, bad ki briew ki lah ban im ka jingim kaba thikna,” u la ong.
