Nongpoh, Risaw 30
Kum shi bynta ka jingbteng ban wanrah ïa ka leit ka wan kaba suk bad kaba shngaiñ ha ka surokbah, ki pulit ka Ri Bhoi District hapoh ka jingïalam jong u Senior Superintendent of Police (SSP), u Vivekanand Singh Rathore bad u Additional Superintendent of Police, Bah Orville Isaac Massar, ha ka sngi Palei, ki la pynlong syndon da ka jingai jinghikai ïa ki nongñiah trok ha Umsning Bypass jong ka surobah National Highway 6.
Kane ka jingpynlong ki pulit Ri Bhoi ïa ka jingai jinghikai ban pynsngewthuh ïa ki nongñiah trok ba kumno kin ñiah ïa ki kali ki jong ki ha ka surokbah, ka dei hadien ba la ïohi bunsien ba ki ju ñiah beit na ka liang ka mon jong ka surokbah, kaba long kaba bakla bad buh jingma ïa kiwei pat kiba leit ba wan.
Haba kren sha ki lad pathai khubor hadien katei ka jingai jinghikai ban pynsngewthuh ïa ki nongñiah trok, u Rathore u la ong ba ki pulit Ri Bhoi kila shimkhia shikatdei ha kaba ïadei bad ka jingshngaiñ jong ka leit ka wan ki paidbah ha surok bad mynta kane kala sdang ban seisoh, da kaba kdew ba ka jingïeng beaiñ jong ki trok khamtam ha ki jaka na Byrnihat haduh Jorabat kam don shuh, lait noh sa tang katto katne tylli ki kali kiba sniew lane kiba sangeh tang shiphang arphang.
U la ïathuh ruh ba bun na ki nongñiah trok kila sdang ban sngewthuh ïa ka rukom ñiah kali ha surokbah, hynrei ki dang don pat kiba dang ïaid bakla ha ka liang ka diang. U la ong ruh ba ha kane ka jingai jinghikai, la bthah ïa ki nongñiah trok ba kin ïaid nyngkong ha ka liang ka diang kaba dei ka rukom kaba beit katkum ka aiñ, nangta de sha ka liang ka mon, pynbud sa ka rukom ban jam na ka liang ka diang sha ka liang ka mon, ha ryngkat ka jingshim bynta lang jong ki nongñiah kali rit bad hadien ba la pyndep ïa kane ka jingai jinghikai, la shim jingmut pat na ki nongñiah kumno ki sngew bad kaei kaba ki sngew ïahap.
Utei u heh pulit ka Ri Bhoi u la ong ruh ba bun na ki nongñiah hi ki la pynpaw ba ki suk ban ïaid ha ka liang ka diang jong ka surokbah naba kim donkam shuh ban khuslai ban ailad ïa kiwei pat ba kin jam shakhmat bad ba kane ka dei ruh ka rukom katkum ka aiñ. U la ong ruh kumba bun hi ki nongñiah ki don ki bym sngewthuh phareng, ki don ki bym sngewthuh hindi bad ki don ruh ki bym sngewthuh Khasi, na ka liang ka tnat pulit ka Ri Bhoi, shen kin sa pynmih ruh da ka durkhih, khnang ba baroh ki nongñiah kali kin sngewthuh bad lait na ka jingshah daiñ kuna bad kumba ka jingshngaiñ jong ki paidbah nongleit nongwan ka dei kaba hakhmat eh, ki bor pulit kin ïai bteng ban pyntreikam ïa kine ki aiñ ñiah kali.
