Gaza Strip, Risaw:
Ka tnat ïada jong ka Gaza, ka la pynbna ba ka Israel, ka la leit hiar thma da ki liengsuiñ ha ka Sngi Ba-ar, wat hapdeng ka jingsangeh thma kaba dang ïaid shakhmat hadien ba ki shipai Israel, ki la kynnoh ïa ka Hamas, ba ka la hiar thma ïa ki shipai jongka bad pynkheiñ ïa ka jingïateh kular, ba la lamkhmat da ka US.
La iathuh ba ym duna ia ka 30 ngut ki briew kiba la khlad ha katei ka jingleit hiar thma jong ka Israel, kiba ka la thmu ia ki katto- katne ki bynta jong ka nongbah Gaza.
Hynrei, u Vice President jong ka US, u JD Vance, u la ong ba ka jingsangeh thma ka dang ïai bteng wat hapdeng ki “jingïakynad” kiba la mih ha ka Sngi Ba-ar.
U Benjamin Netanyahu, u Myntri Rangbahduh jong ka Israel, u la ai hokum ban leit hiar thma jur biang ia ka Gaza, la ong ka ophis jong u, katba u Myntri iada ri, u Israel Katz, u kynnoh ia ka Hamas, ba ka la hiar thma nyngkong ia ki shipai Israel ha Gaza.
“Ka jinghiar thma jong ka Hamas mynta ka sngi ia ki shipai jong ka IDF (Israel Defense Forces) ha Gaza, ka dei ka jing iaid lait ia ki jingiateh soskular ba la deh ban iateh bad mynjur ban sangeh iasiat noh bad kumta ruh na ka liang ka tnat shipai IDF, kan hap ban ai da ka jubab kaba shyrkhei ban pynsngewthuh ia ka Hamas.”, la ong u Katz ha katei ka kyrwoh.
Katba u Katz um shym la ong shano ki shipai ki la shah thombor, ka Hamas ka la ong ba ki briew jong ka Hamas, kim shym don jingiadei ei-ei bad ka jingjia iasiat ha Rafah.
Ha ki khubor ba la pynbna paidbah ha ka Fox News bad ba la pyllait ruh ha ki rynsan ‘Social Media’ da ka White House, u Vance u la ong ba ka jingsangeh thma ka dang iai bteng bad ïaid shakhmat kumba la dep ban pynbeit da ka US bad kiwei ki ri kiba wanrah ia ka jingiasuk hapdeng ka Israel bad ka Hamas.
Hynrei u la ong ba kata kam mut ba kin nym don shuh kino- kino ki jingïakynad kiba rit- ba ria hynrei ba ki long tang ki jingiakynad kiba sah na ka jingiapher jingmut kaba jur ha kito ki por ba la leit.
