Shillong, Risaw 30
Ka ‘thei apkol ka Jylla ka Ribansi Jamu ka la ïoh ïa ka lad ban mihkhmat ïa ka kynhun ïalehkai U-20 ka ri India kum ka nongapkol, ha ka kylla miet jong ka jingïalehkai paralok pyrshah ïa ka Kazakhstan dang shen.
Kane ka kynhun ka la leit sha Kazakhstan ban ïakhun pyrshah ïa ka kynhun ïalehkai U-19 ha ki ar tylli ki jingïalehkai paralok kiba la long ha 25 bad 28 tarik mynta u bnai.
Te kumta ka India ka la khur jingjop nyngkong da 3-2 kol bad hadien ka la ïakhaid mar 1-1 kol. Ka Ribansi ka la ïoh ban ïalehkai ha ka kylla step ha ka jingïakhun kaba nyngkong bad shah thep kol lyngba ka penalty.
Kane ka jingleit shim bynta ka India ha kitei ki ar tylli ki jingïalehkai paralok ka long shi bynta ban pynkhreh na ka bynta ka AFC U-20 Women’s Asian Cup 2026, hadien ba ka India ka la ïoh rung ha u Nailar mynta u snem.
Ka Ribansi ka la don bynta ha kane ka kynhun ïalehkai jong ka India, hynrei kam shym la ïoh ban mih madan. Kane ka ‘thei ïalehkai kaba na Ri Bhoi District ka la shah jied ban don bynta hapoh katei ka kynhun ïalehkai U-20 hapoh ka jingïalam u Joakim Alexandersson kum u coach, hynrei la ailad ïa ka Monalisha Devi Moirangthem namar ka la mlien bad ka la ïoh ruh ban mihkhmat ïa ka kynhun ïalehkai (senior).
