Jowai, Risaw 30
Ka Youth & Cultural Sohmynting ka la khur jingjop ha ka Super Division, katba ka Catholic Youth ka la jop ha ka 1st Women League Football Tournament ba la pynïaid da ka West Jaiñtia District Sport Associa-tion (WJDSA) ha ka sngi Palei ha Kiang Nangbah Stadium, Jowai.
Ha ka jingïalehkai jong ka Super Division, ka Youth & Cultural Sohmynting ka la pynliem noh ïa ka 7 Wasa United da 2-1 kol. Ïa kine la thep da u Damang L Pyrtuh ha ka minit kaba 39 bad u Kamwadamonmi Pamthied (66), katba ïa ka shi kol jong ka 7 Wasa la thep da u Jeff K Rymbai (23).
Haba phai sha ka 1st Women League, ka Catholic Youth ka la pynliem noh ïa ka Sabahmuswang lyngba ka shi kol ba la thep da ka Meriful Dkhar ha ka minit kaba 40.
