Shillong, Risaw 30
U Chief Executive Member (CEM) ka Jaiñtia Hills Autono-mous District Council (JHADC) u Bah Thombor Shiwat u la ong ba ka shnong Lapangap kam dei kaba hap hapoh ka “No Man’s Land” hynrei ka dei kaba dang hap hapoh jong ka Meghalaya, namar ka district council ka la pynmih ïa ka ‘appointment letters’ ne ka shithi thungkam sha u Rangbah Shnong jong katei ka shnong.
“Da shisha kam dei ka ‘no man’s land’ namar ïa ka shnong Lapangap la ithuh da ka district council bad ïa ka jingthung ïa u Rangbah Shnong ruh la pynmih da ka JHADC. Namarkata, ka shnong Lapangap ha hap bad dei hapoh u pud u sam jong ka Meghalaya. Kam hap satia ha kata ka jaka ba don ka jingïakajia (under disputed),” la ong u Bah Thombor Shiwat haba kren sha ki nongthoh khubor ha ka sngi Palei.
U CEM u la pyntip ba ka jingjia kaba dang shen hapoh ka shnong Lapangap, West Jaiñtia Hills district, ka dei kaba la ai ding da uwei u riew shimet, hynrei ïa une u briew haduh mynta ym pat lah ban ithuh satia.
“Ngim don jingtip satia ba mano une u briew u dei hynrei ngi la mynjur ban wanrah ïa une u briew uba la leh ïa ka kam ban aiding bad pynshit hynrei ngim pat lap satia ïa u,” la ong u CEM.
Katkum ka jingïathuh ka jong u, ka jingot ïa u kba da ki nongrep Pnar ka la jan dep artad pura.
U Bah Thombor Shiwat u la kdew ruh ba ka jingpeit ïa ka jinglong jingman ka hap hapoh ka jingkhmih jong ka Sorkar Jylla, kaba dei ban shim ïa ki lad ki lynti ban ai ka jingïada ïa ki nongshong shnong kiba shong ba sah ha ki shnong khappud.
Shuh shuh u Bah Thombor u la kdew ruh ba ka regional committee kaba peit bad khmih ïa ka Block I kam pat shym la ïakynduh ne ban don kino kino ki jingïalang naduh ka ilekshon MLA kaba la dep, bad ka jinglong jingman jong ka jingïakren kam khappud ha ka bynta kaba ar ka dang sah bad ym pat tip lano kan long.
Haba kylli hato ki ar tylli ki Sorkar ki la pynslem ban pynbeit ïa ka jingïakajia pud ha ki hynriew tylli ki jaka, u CEM u la ong ba imat ka lah ban long kumta.
U la ban ruh ba ka por ban pynlong ïa ka jingïalang, barabor ka ju shah ktah na ka jingdon jong ki ilekshon la ha Assam ne Meghalaya, kaba la wanrah jingeh ban pynlong jingïalang ban ïakren halor ki mat khappud.
“Ngam dei u chairman jong ka regional committee. Lada u chairman un khot ïa ka jingïalang, ngi hap ban ïakren ïa kane ka mat. Lada ngi kwah ïa ka jingïalang na ka liang ka jong ngi, kan don pat ka ilekshon ha Assam bad lada ki Assam ki kwah ban khot jingïalang, kumta kan sa don pat ka ilekshon ha Meghalaya, kum kine kiei kiei ki don,” la ong u Bah Thombor.
