Shillong, Risaw 30
Ka UDP kaba dei ka seng kaba ïatreilang bad ka NPP ha ka Sorkar MDA-2 ka la pynkhreh ban pynïeng kyrtong ha ka ilekshon MDC sha Garo Hills Autonomous District Council ka ban long ha u snem ban wan.
Haba ïakren bad u Bah Titosstarwell Chyne uba dei u General secretary ka UDP Sengkmie u la ïathuh ba ka UDP ka la pynthikna ban pynïeng kyrtong ha ka ilekshon MDC jong ka GHADC tangba kim pat tip la kin pynïeng katno ngut.
U la ïathuh ba ka UDP ka la dep pynkhreh ïa kane ka ilekshon mynta kaba la ïaid la ar bnai eiei hynrei ki dang ap ïa ka kaiphot na ki nongïalam ka UDP na rilum Garo.
“Ngin sa pan noh shen ïa ka kaiphot na ki nongïalam ka UDP na rilum Garo khnang ba ki nongïalam ka UDP na Shillong kin hiar sha Tura ban pynkhreh ban wad kyrtong,” u la ong.
Haba kylli biang kumno ka seng ka sngew don jingkyrmen ne em ha kane ka ilekshon ba mynta namar ka ilekshon ba la dep ka UDP kam shym ïoh wat tang uwei ban poi sha ka thong, u Bah Titos u la pynpaw ba mynta ka kynti ka UDP ka don jingkyrmen kumta ka la pynkhreh ban pynïeng kyrtong biang ha kane ka ilekshon MDC sha ka GHADC.
Kane ka jingpynkhreh ka UDP ïa ka ilekshon MDC sha GHADC ka dei namar ka Sorkar Jylla ha ka jingïakynduh ka kynhun Myntri ha ka 29 tarik Risaw ka la ïakren sani bha ban pynlong noh ïa ka ilekshon MDC sha GHADC.
La sngewthuh ba ka ilekshon MDC kan sa long ha u snem 2026 tangba ïa ka tarik bad u bnai ka Sorkar Jylla lyngba ka tnat DCA kan dang pynkhreh.
