Ka kam shongkha shongman ka long ka kam kaba kyntang bad ka long ka kam kaba eh ban bud beit bad ryntih tang para jait na kajuh ka thymmei. Kane ka kam ka long kaei kaei ka bym lah ban pynshai thikna mano mano ruh ba dei na kaei ka daw ba ka don ka jingïapait khiewja hapdeng u lok (Tnga) bad ka lok. Lehse ki don ki daw baroh arliang kynthei bad shynrang. Ban ong ba dei tang na ka liang u shynrang ruh ym sngewdei. Ban shim ba dei tang na ka liang ka kynthei ruh kam lah ban long. Dei kane ka daw ba sa mih ka jingdawa ban don noh da ka ain shongkha shongman(Marrriage Act) khnang ban tehlakam ïa ka jingïaphet tnga. Lada ym don ka jingïaphet tnga te yn lah aiu ïa kata ka aiñ. Ka daw ba kham kongsan hapdeng ka jingïaphet tnga ka dei ka kam klim. Don ba klim u Shynrang don ruh ba klim ka kynthei phin shem ha ka imlang ka sahlang jong kano kano ka jaitbynriew. Kiwei kiwei ki daw kim da pynlong haduh ba kin ïa phet tnga syndon. Dei kane ka kam klim ki arliang manla kaba la wanrah ka jingïapher tnga ne ïa pait khiew ja. Kane ka wan jia ym tang ha ri jongngi hynrei ha kiwei kiwei ki jaitbynriew ruh ka don kane ka ïa phet tnga watla ki don ka dustur ban ri bun tnga. Ki jaitbynriew bapher bapher ha satlak ka pyrthei ki don beit ka jingia shongkha khleh bad kiwei kiwei ki jaitbynriew. Kumta ban pyrkhing ïa kane ka shongkha khleh ym lah ban pynbeit da lei lei ruh. Ka dang kham suk ïa ka Ut ban bsut lyngba ka thliew thyrnia kumba ong mano re ban ïa kaba khang lad ïa kane ka jingshong kha khleh.
C. B. Iawphniaw
