Shillong, Risaw 30
U Symbud Myntri Rangbah ba khmih ïa ka tnad PWD u Bah Prestone Tynsong u la pynthikna ba ka Sorkar kan shimkhia ban thaw ki lad ki lynti haba ïadei ban ïada ka jingjngut jong ka Wah Umngot.
U Bah Prestone haba jubab haba ïadei ka jingjngut jong ka Wah Umngot u la ong, ba la bthah ïa ka kompeni ba pyntrei ïa ka surok ba kan shim ki lad ki lynti ban ïada na ka jingtuid ki jaboh sha ka wah, u la kubur ruh ba ka long kaba shem jingeh ban khanglad ïa ka jingtuid ki jaboh sha ka wah, khamtam ha ka por ba dangtih bad ba dang shna ïa ka surok.
U Bah Prestone u la ban jur ba la bthah ïa ka kompeni ban kiar na kaba pyntuid jaboh hajan ki wah kiba tuid sha ka wah Umngot. U la ong, “Ngi la bthah ïa ka kompeni ban pynsangeh ïa ka jingpyntuid ïa ki jaboh sha ki wah, kumjuh ruh ki wahrit, namar na kaba tuid ki jaboh na ki wahrit ki jaboh ki poi sha ka wah Umngot bad ba kane kan sa buh jingeh, hynrei ngi la ai jingbthah ïa ka kompeni ban pyrshang ban pynduna bad ban ïada ïa ka jingpyntuid ki jaboh sha ka wah bad ban ïada na ka jingjngut jong ka wah,” la ong u Bah Prestone.
Shuh-shuh u Bah Prestone u la ong ba um lah ban ong eiei, namar ki don ha ka hukum treikam bad ka jingïateh kular ba haba ki tih surok, ki dei ban pynkhuid ïa ki jaboh sha kawei pat ka jaka.
“Ngam ong ba haba khlong khyndew, uwei u maw ruh un ym hap shuh bad kata kaba ym lah ban long. Haba sdang ban pyntrei ïa ki jingtei, kin don beit ki jaboh ba mih, ngi la bthah ïa ka kompeni ban kiar na kaba bret ïa ki jaboh jabaiñ hajan ki wah kiba tuid sha ka wah Umngot,” la ong u Bah Prestone.
U la ong ka wah Umngot, ka la ïoh ïa ka nam kum ka wah kaba khuid tam ha dewbah Asia katba mynta ka la kylla umkthieh, kane ka la pynkyndit ïa ki nongshong shnong ka thaiñ, ki nong pynïaid ïa ka kam jngohkai pyrthei bad ki seng ïada Mariang.
U MP ka Shillong u Dr Ricky Syngkon u la dep ban ai jingthoh sha u Myntri ka sorkar pdeng ba khmih ïa ka ‘Road Transport bad Highways’ u Nitin Gadkari kumjuh ruh ïa u Myntri ba khmih ïa ka ‘Environment, Forest bad Climate Change’ u Bhupender Yadav ha kaba u la kyrpad ba kin tuklar lem ïa ka jingjaboh bad jngut jong kane ka wah.
