Shillong, Risaw 30
Ka kynhun ba ïatreilang na ka United Khasi People’s Organisation (UKPO) bad ka Hill People Cultural Forum (HPCF) ki la leit ban jngoh ïa kawei ka shnong Khasi kaba don ha Dhansiri (hajan Diphu) mynshem taïew ban pynpaw ïa ka jingïatylli bad ban weng ïa ki jingeh jong ki Khasi kiba shong ba sah hapoh Karbi Anglong khappud bad ka Nagaland.
Ïa kane ka kynhun la ïalam da u President ka UKPO u Bah Pynshngainlang Rattane, ha kaba la synran lang lem bad u Bah Sunday Sten, u Precious Masharing, bad u Bah Cletus Kholar.
Ha kane ka jingïalang jong ka Hill People Cultural Forum kiba don ki long u Dhiraj Diphusa uba dei u Secretary General ka HPCF bad u Tongthang Touthang uba dei ruh u nongïalam ka Gin-Fed Board Chairman ka KAAC bad u Vice President ka HPCF.
Ha kane ka jingleit jngoh, ki nongmihkhmat ki la ïakren bad ki nongshong shnong kiba la ïathuh ïa ki jingeh ki jong ki bad ban bishar bniah ïa ka jingdonkam jong ki lad pynroi na ka Sorkar.
Ka kynhun ka la pynthikna ïa ki nongshong shnong Khasi ba kim dei ban tieng ne duh jingkyrmen na kino kino ki jingjia ba dang shen, da kaba pynskhem biang ïa ka jingkular jong ki ban pynthikna ïa ka jingshngaiñ, la ha kino kino ki bynta na bynta ka bha ka miat shaphrang, bad ka jingpynneh pynsah ïa ka kolshor.
“Ka jaidbynriew Khasi kam dei ban sheptieng ha kano kano ka jinglong jingman, ka UKPO ryngkat ka jingkyrshan ba pura jong ka HPCF ka ïeng skhem bad ki”, la ong u President Bah Pynshngainlang Rattane ha ka jingkren jong u.
Ka Hill People Cultural Forum (HPCF) kaba kynthup ïa ki 26 tylli ki jaidbynriew bad ki jaidbynriew na kylleng ka Karbi Anglong, ka la pynpaw biang ïa ka jingkyrshan kaba pura ïa ki paid Khasi kiba shong ba sah ha baroh ar tylli ki Elaka hapoh ka East Karbi Anglong bad West Karbi Anglong.
U Vice President ka HPCF u Tongthang Touthang u la ban jur ïa ka jingïatylli hapdeng baroh ki jaidbynriew lum, da kaba pynpaw ba ka jingthmu jong kane ka forum ka long ban kyntiew ïa ka jingsuk, ka roi ka par, bad ka jingburom markylliang hapdeng ki jaidbynriew bapher bapher jong ka thaiñ.
U Secretary General ka HPCF u Dhiraj Diphusa u la pynthikna ruh ban don ryngkat bad ka jaidbynriew Khasi ha man la ka khyllipmat bad ban ïarap ïa ki ban kyntiew ïa la ka jong ka kolshor.
Ka UKPO, ka seng ba hakhmat eh kaba mihkhmat ïa ki paidbah Khasi, ka dang ïai bteng ban trei na ka bynta ban kyntiew, ban pynbha, bad ban pynneh pynsah ïa ki jinglong tynrai bad ka kolshor Khasi.
La pynkut ïa kane ka jingleit jngoh da ka jingpynthikna na baroh ar tylli ki seng ba kin ïai bteng ban ïakren bad ki bor Sorkar ban pynthikna ba ïa ki jingdonkam ha ka roi ka par jong ki paid Khasi ha kane ka thaiñ yn pynbiang ha ka rukom kaba biang.
