Shillong, Risaw 30
Ka kynhun jong ki Tourism Societies hapoh ka Darrang Elaka, ha ka 30 tarik u Risaw 2025, ki la leit ban ïa kynduh ïa u Bah Prestone Tynsong, u Symbud Myntri ka Sorkar Jylla ba khmih ïa ka tnad PWD (road) halor ka jingeh kaba ki la mad na ka jingjngut ka um ha wah Umngot.
Kane ka kynhun ki Tourism Societies, ka kynthup ïa ka Darrang Tourism Promotion and Development Society, Shnongpdeng Tourism Development Society, bad Dawki Tourism Development Society, ha ryngkat ka jingwan lang u Dalloi ka Elaka Darrang, u Bah Pyrwa Lymba.
Ha kane ka jingïa kynduh, ka kynhun ki Tourism Societies ki la pynsngew ïa ka jingeh halor kane ka bynta, namar kum ha kane ka por tlang ba rkhiang ka suidbneng, ym juh don ka jingjngut ka wah Umngot, hynrei dei tang ha u ne u snem ba mynta ka jngut bad kaba la wanrah ïa shibun ka jingduhnong ïa ki nongtrei tourism kiba im kamai jakpoh na kane ka wah.
“Ka daw kaba la pynlong ïa kane ka jingjngut ka wah, kadei kaba la wan na ka jingtrei surok Shillong Dawki ha ki thaiñ sharum Laitlyngkot, kaba ïoh lehse don ka jingtheh khyndew ha ki wah kiba la poi shaduh Dawki” ki la ong.
Ka kynhun ka pynpaw ruh ba kim pyrshah ïa ka roi ka par ban shna surok bad ki pynpaw ba ki da sngewbha eh ban ïa trei lang bad ka bor Sorkar haba don kino-kino ki jingeh ban thaw lad ban pynbeit. Kumta ki la kyrpad ïa ka Sorkar ban pynbeit noh kloi namar ka aiom wan kai ki tourists ka la poi.
“Ki trai shnong ha kane ka thaiñ ki ïoh ïoh kam na kane ka jingwan ka tourism da kaba ïalam kai ïa ki tourists, kaba buh ïingbasa, kiba shong dukan bad don ruh kiba shim da ki loan na bank ban sengkam lajong, hynrei mynta ki la hap ban mad jingeh bad ka kamai kajih jong ki ruh ka la hiar arsut” ki la ong.
Ki la pyntip ruh ba hadien ka jingïa kynduh ïa u Bah Prestone Tynsong, ki la pynpaw ka jingkmen namar u la shimkhia mardor ban thaw lad ban pynbeit ïa kane ka jingeh.
Ha kane ka jingleit ïa kynduh, la synranlang ruh da u MLA barim ka Amlarem Konstitwensi, u Bah Stephanson Mukhim.
