Shillong, Risaw 30
U Nongïalam ka TMC Legislature Party uba dei ruh u Myntri Rangbah barim ka jylla u Mukul Sangma ha ka sngi Palei u la ong ba um don jingtip halor ka rai jong u para jong u, uba dei ruh u MLA barim ka Rangsakona u Zenith Sangma ban leit phai biang sha ka Congress.
Kane ka la wan shisngi hadien ba u Zenith u la leit pynïasoh biang sha ka Congress ha ka jingïadon lang u in-charge ka AICC ba khmih ïa ka Meghalaya, u nongïalam ka MPCC bad ka MP jong ka Tura.
Haba kylli halor kane ka jingleit phai biang jong u Zenith, u Mukul u la ong, “Ngi lah ban kren kum shipara, ym kum ki nongïalam seng saiñ pyrthei mynta. Hooid, ym shym la ïathuh ïa nga, bad ruh um shym la ïathuh ïano ïano ruh. Kaei kaei kaba u la rai, u la rai hi nalade marwei. Baroh ki long kiba donkam, khlem da kheiñ ïa uno uno ne kano kano namar baroh ki riew shimet ki long kiba kongsan.”
U Mukul u la kam ba kin don ki jingeh haba ki dkhot jong ka seng ki shim rai ban mih noh, da kaba ong, “Kin don beit ki jingeh, kumba nga la ïathuh, haba ngi thaw ïa ka seng kaba thymmai bad nangta, ha kajuh ka por, lada don mano mano hadien ba la don slem ha ka kam saiñ pyrthei, ki shim rai noh ïa kaei kaei, phin hap ban sngewthuh ba u dei uba don ka jingkitkhlieh hi kaba biang ban shim ïa la ka jong ka rai kaba biang.”
Haba la pynbor ïa u ban kynthoh shuh shuh, u Myntri Rangbah barim u la ong, “Tang kawei ka long ba, kumba nga ïathuh ïa phi, la buh ïa nga ha ka jingdum naba um shym la ïathuh ne ai dak satia. Kumta, ha la ka jong ka jingstad, u la shim ïa ka rai – tang kata kaba phi lah ban ïoh na nga mynta.”
U Mukul u la kiar na ka ban kynthoh shuh, da kaba ong, “Kumno ngan kynthoh halor kane? Kumno ngan tip ïa kaei kaba don ha ka jingmut jong u? U la rai ban nym kren bad nga shwa ban leit, kumta ha kane ka khyllipmat ngam shym la kren – te balei ngan kren mynta?”
