Gaza Strip, Risaw:
Katkum ki khubor, la ong ba ka Hamas ha ka Sngi Nyngkong ka la aiti biang sa ia katto- katne kiba sah jong ki nong Israel kiba la iap noh hapoh ka kti jong ka Hamas ha Gaza Strip, mynba ka thma jong ka Hamas bad ka Israel ka dang jur bha.
U Myntri Rangbah-duh ka Israel, u Benjamin Netanyahu, ha ka Sngi Nyngkong u la pyntip ba ka Israel ka la ioh pdiang ia kawei ka synduk metiap kaba ka Hamas ka la aiti noh bad kaba ka Hamas ka iathuh ba ka long ka met jong uwei u nong Israel uba 16, napdeng jong ki 28 ngut ki nong Israel kiba la khlad noh mynba ki dang don ha ka kti jong ka Hamas hapoh Gaza Strip, naduh ba la jia ka jingiakhun thma ka Israel bad Hamas kaba la sdang ha ka 7 tarik u Risaw jong u snem 2023.
Kumta la ong ba ka tnat shipai jong ka Israel bad ki tnat pahara ba dei khmih halor kane ka kam, kin leit ban shimti ia katei ka synduk na Gaza ban pynpoi beit- beit sha Israel, ia kaba yn sa leh pyndonburom ha ka jingleh burom jong ka tnat shipai Israel hashwa ban aiti noh ia ka, sha ka tnat National Forensic Institute naka bynta ban pyndep ia ka jingpynithuh ba pura bad ban pynphai noh pat ia katei ka met ba sah, sha ki bahaiing- bahasem kiba dei trai.
La ong ba ki bor pyniaid ka Israel, ki la pyntip sha ki bahaiing- bahasem jong baroh kitei kiba khlad ha Israel bad kiba la shu jah rngai kumto naduh ba sdang jong ka thma, ia kiba ymshym la lap shuh napdeng jong kito kiba dang im bad kiba la pynphai biang noh da ka Hamas ha kine ki khyndiat taïew ba la dep. Ka Israel ka la pyntikna ruh ba kan nang iai bteng ban bud-dien bad ban pynphai iing ia baroh ki nong Israel kat kiba dang sahkut ha Gaza, la ka long ba ki dang im ne ki la khlad ruh bad ba ka Israel kan nym shongthait katba kam pat ioh pdiang lut ia ki met jongki baroh.
