Shilong, Risaw 30
Ka jingjyllei jong u jingdih pynbuaid u ‘Drok’ hapoh ka Jylla, ka la long shisha kawei na ki mat kaba la ktah bha ïa ka imlang ka sahlang, ha kaba la lah ban sakhi ruh ïa ka jingkiew jong ki kam sniew ha kane ka Jylla katba nang mih ki sngi.
Ha ka 30 tarik u Risaw 2025, ka sngi ba ka Mizo Hmeichhe Insuihkhawm Pawl (MHIP) lane ka Mizo Women Federation, ka la pynlong ïa ka jingrakhe dap 25 snem kynthih jong ka jingïaid lynti jong ka, na ka liang ki nonglum khubor ki la ïoh ban ïakren bad u Lalduhoma, u Myntri Rangbah ka Jylla Mizoram halor ki sienjam kiba katei ka Jylla ka shim, haba ïadei bad kane ka mat jong ka jingjyllei u ‘Drok’.
U Lalduhoma, u la pyntip ba ha katei ka Jylla ka don ka Security Committee kaba la khlieh hi da ma u, kaba khmih bniah halor u jingdih buaid u ‘Drok’.
U la ong ruh ba kane ka Security Committee, ba ka long kaba ïarap shibun ban tehlakam ïa u ne u jingdih u ba sniew.
Shuh shuh u la bynrap da kaba ong, ba lehse ka jingdon kum kane ka komiti, kan lah ban ïarap ruh ïa ka Jylla Meghalaya, ha ka ban tehlakam ïa u ‘Drok’.
