Shillong, Risaw 30
Ka kynhun ïalehkai ka jylla Meghalaya ka la jam sha ka semi final ha ka lympung ïalehkai Sub-Junior Boys National Football Championship 2025-26 (Tier 2) hadien ba ka la lah ban pynliem noh sa ïa ka Himachal Pradesh da 4-0 kol ha ka sngi Palei ha Narainpur, Chhattisgarh.
Kane ka nam jop ka la wan urlong u lyngba u Marbiang Marweiñ, uba la ïoh da ka hat-trick.
Lyngba ka jingjop da 11-0 kol ïa ka Andhra Pradesh bad 6-1 kol ïa ka Chhattisgarh, ka Meghalaya mynta hapoh ka jingïalam u Bah Dapmon Tariang ka la bteng ban bat ïa ka kyrdan ba hakhlieh ha ka Group-C da kaba kamai 9 point na ki lai sien ïakhun.
Haba phai sha kane ka jingïakhun baroh ar ki kynhun ki la pyrshang ban ïakhun tyngeh, hynrei tang ha ka minit kaba 8 ka Meghalaya ka la ïoh ban pynkhih jar nyngkong lyngba u Marbiang. Hadien shiteng kynta une u rangïalehkai shakhmat u la pynbud biang ïa ka kol kaba ar ha ka minit kaba 39 bad hashwa ban kut ka kylla step u la khur syndon ïa ka hat-trick da kaba thep ha ka minit kaba 45+2 na ka bynta ban tam da 3-0 kol.
Hadien katto katne por ba la bteng biang ïa ka jingïakhun jong ka kylla miet, ka Meghalaya ka la thep biang sa shi kol lyngba u Wanpyndapbor Nongsiej (62). Haduh kaba kut ka jingïalehkai ka Himachal kam shym la lah ban pynphai bad ka la mad ïa ka jingshah rem.
Te kumta u Marbiang uba la khur ïa ka hat-trick, u la ïohpdiang ha ka sien kaba lai ïa ka nam Player of the Match. Haba kheiñ lang ïa ka jinglah ban thep kol jong u ha kine ki lai tylli ki jingïakhun ki la long 9 kol.
Ka Meghalaya kan pynkhreh ban ïakhun semi final ha ka 1 tarik u Naiwieng pyrshah ïa ka Telangana, kaba la bat ïa ka kyrdan ba hakhlieh duh jong ka Group-A.
