Nongpoh, Risaw 30
Ka ‘thei ïalehkai Muaythai ka Jylla ka Ahphonsa Zinia Wriang ka la wanphai sha la ïing hadien ba ka la lah ban khur ïa ka takma rnong ha ka 3rd Asian Youth Games kaba la long ha nongbah Sakhir jong ka ri Bahrain.
Ïa kane ka samla kaba dang 17 snem ka rta, la pdiang burom da ki dkhot jong ka Muaythai Associa -tion of Meghalaya (MAM) hapoh ka jingïalam u Bah Angelus Sun kum u President bad uba long ruh ha kajuh ka por kum u coach, ha ka sngi Balang ryngkat kiba haïing hasem lem bad ki paidbah katei ka thaiñ naduh na Guwahati haduh ban da poi ha Indoor Hall, Umlyngkdait, Ri Bhoi District.
Ha katei ka lympung ïalehkai kaba la sdang naduh 22 tarik bad ka ban kut haduh 31 tarik mynta u bnai, ka Ahphonsa ka la lah ban pynpaw ïa ka jingtbit na ka bynta ban long tang marwei napdeng ki shiphew ngut ki nongïalehkai Muaythai jong ka ri India ban khur ïa katei ka takma.
Lah ban pynpaw hangne ba ka Alphonsa ka dei kaba shong ba sah ha ka shnong Umsaitsning, Ri Bhoi District bad ka dei ruh ka khun jong u Bah Protasius Mawlong bad ka Kong Diamond Wriang bad ka la mihkhmat sha katei ka lympung lyngba ka Muaythai Association of Meghalaya, kaba hap hapoh ka United Muaythai Association ka ri India.
Ha katei ka janmiet jong ka sngi Balang, u Bah Angelus haba ai jingkren ha katei ka jing-pdiang burom kaba la pynlong ha phyllaw jongka Indoor Hall, Umlyngkdait, u la pynpaw ïa ka mynsiem jong ka jing-sngewkmen shi katdei ba ka samla Alphonsa Zinia Wriang ka la la lah ban wanrah ïa ka nam bad ka burom ïa ka Jylla bad ka ri hi baroh kawei khamtam ïa ka Muaythai Association of Meghalaya.
U la ong ruh ba lyngba ka jingïoh khur takma jong kane ka samla, kan pynlong ruh ïa katei ka synjuk ba kan nang trei shitom shuh ban pynmih bad pynkhreh ïa ki khun samla kiba lah ban wanrah ïa ka nam ka burom ym tang ïa ka Jylla, hynrei ïa ka ri hi baroh kawei ha ki lympung ïakhun ki ban sa long ha ki sngi ki ban wan.
Na ka liang kiba haïing hasem jong ka samla Alphonsa pat ki la pynpaw ka jingsngew -nguh ïa ka Muaythai Association of Meghalaya, ba dei lyngba ka jingbtin lynti bad ka jingïalam jong ka ba kane ka samla ka la ïoh ban poi shaduh katei ka nam kaba long ka burom kaba khraw ïa ka ïing ka sem, ka Jylla bad ka ri hi baroh kawei.
