Shillong, Risaw 30
U Chief Executive Member (CEM) ka Jaiñtia Hills Autono-mous District Council (JHADC) Bah Thombor Shiwat u la pynpaw ba ka Council ka mynjur ban pdiang ïa ka jingtyrwa ka Sorkar ba kan pynsiew tulop ïa ki nongtrei hynrei kane kan long pat ryngkat ki kyndon.
“Ngin pdiang ïa kane ka jingtyrwa ka Sorkar hynrei ryngkat bad ki kyndon,” ong u Bah Thombor Shiwat haba ïakren bad ki nongthoh khubor ha ka sngi Palei hadien ka jingïalang bad u Symbud Myntri Rangbah ba khmih ïa ka tnat District Council Affairs (DCA) Bah Prestone Tynsong, uba la kylli halor ka rai jong ka Council halor kane ka jingtyrwa.
Hynrei u CEM u la pyntip pat ba ka Council kam pat ïoh ban phah ne aiti ïa ka jubab jong ka sha ka Sorkar Jylla.
Halor ki kyndon, u CEM ula batai, ki ïadei bad ka jingkwah jong ka Council ban pynïaid hi noh ïa la ki jong ki jingdon jingem kynthup ki Mines and Minor Minerals bad Transport, kiba lum mynta da ka Sorkar Jylla.
Ka Council ka kwah ban pynduna ïa ka jingshaniah ha ka Sorkar Jylla bad pan ïa ka jingïarap halor ka rukom pynïaid ïa ka pla tyngka, u la ong.
U Bah Thombor u la pyntip ruh ba ka Council ka dang ap mynta ïa ka Sorkar Jylla ban kheiñ ïa ka bhah kaba dei ban ïoh ka Council. Hadien ba la dep ban ïoh ïa ka jingkheiñ, ka Council kan sa rai ïa kaei kaba ka dei ban leh.
