Shillong, Risaw 30
Ki saw ngut ki briew ki la shah ujor halor ka jingkynnoh ba ki donkti ban die beaiñ ïa ka umphniang diesel ha ki klong.
Katkum ka khubor na ki pulit la ong ba u Bah Mecare Suting u la ai ka jingujor ba ha ka 27 tarik mynta u bnai ha ka por kumba 6 baje janmiet, u la sngewthuh ba ki saw ngut ki nongtrei jong u, kiba la tip kyrteng kum u Pyndaplangki Siangshai, Leki Shadap, Ritremi Hasem bad u Jafirul Ahmed, ki la donkti ha ka ban die beaiñ ïa ka umphniang diesel ha ki klong (jerkins) na ka stock yard kaba don ha Mawkhanu ha East Khasi Hills.
Ha kawei pat ka khubor, ha ka 28 tarik mynta u bnai ha ka por kumba 2 baje mynsngi, ki pulit ki la ïoh ban bat noh ïa uwei u briew ba la tip kyrteng kum u Willson Bamon, ha ryngkat bad bun ki tiar ba pyndait ha kamra sum, ïa kiba la kynnoh ba la tuh na 58 GTC Campus, Happy Valley, Shillong. Ki pulit ki la kem noh ïa une u briew.
Ha kawei pat ka khubor shah tuh, u Shah Alom Mondol u la ai ka jingujor ba ha ka 27 tarik mynta u bnai, ha ka por 10 baje mynstep, ki runar bym lah ban ithuh ki la prong tuh hapoh ka ïing sah ka jong u, kaba don ha ka shnong Kilboma ha South Garo Hills bad ban tuh ïa ki khyndai tylli ki mobile phone.
Kumjuh ruh na ka liang jong u Pradip Saha u la ai ka jingujor ba ha ka miet jong ka 27 tarik mynta u bnai, ki runar bym lah ban ithuh, ki la prong tuh hapoh ka dukan ka jong u, kaba don ha ïew Zikzak ha South West Garo Hills bad ban rah tuh ïa ki tiar marbam bad kawei ka monitor jong ka CCTV, bad baroh ki tiar kiba la shah tuh ki la shongdor kumba T.1,08,500/-.
