Shillong, Risaw 30
U Myntri Rangbah ka Jylla u Conrad K Sangma ha ka sngi Palei u la pynlong ïa ka prokram CM Connect ha ka shnong Thangsning kaba hap hapoh ka Mawkynrew Block, East Khasi Hills District, ha kaba u la ïakren markhmat bad ki nongshong shnong ban sngap ïa ki jingeh bad ki jingai jingmut ki jong ki.
Ka prokram CM Connect ka pyni ïa ka jingthmu ka Sorkar ïa ka jingsynshar kaba kynthup lang, kaba ïashimbynta, kaba don jingkitkhlieh, kaba thmu ban pyndap ïa ka jingbym ïahap hapdeng ka jingsynshar bad ki nongshong shnong.
U Conrad u la pynpaw ba u nongmihkhmat jong ki paidbah u la pynpaw ïa ki mat ba kongsan bad ki jingdonkam jong ka thaiñ, kynthup ïa ka jingseng ïa ki Higher Secondary School bad ka Community College, ban weng ïa ki jingeh ha kaba pyntreikam ïa ka MNREGA, ban don shuh-shuh ïa ki Anganwadi Centre, ban buh ïa ka Veterinary Centre, ban pynïar ïa ka skhim pynbiang um bad pynroi ïa ka surok, ki jaka ïalehkai bad ka jingpynkhlaiñ ïa ka rukom pynbiang bording.
U Conrad u la pynbna ïa ki jingthmu kiba bun bad ba T.13.35 klur la mynjur na ka bynta ban tei ïa ka jingkieng na Jongksha sha Thynroit ban pynbha ïa ka jingïadei ha ka thaiñ bad ka jingmynjur na ka bynta ka ‘Artificial Turf’ ka jaka ïalehkai kaba don marjan bad ka madan ‘Indoor Stadium’ ha Mawkynrew Constituency na ka bynta ban kyntiew ïa ki kam ïalehkai ka thaiñ.
U la pynbna ruh ban thaw ïa ki 1,700 tylli ki Mini Anganwadi Centre kiba thymmai ha kylleng ka Jylla hapoh ar snem. Ki Mini Anganwadi Centre kin treikam na ki jaka paidbah hapoh lai bnai. Nalor kata, la mang T.60 lak na ka bynta ban maramot bad ban pynbha ïa ki 20 tylli ki Anganwadi Centre kiba la don lypa hapoh ka State Scheme.
Halor ka jingpynkhlaiñ ïa ki lad ban sumar mrad, u la bthah ïa ki ophisar Sorkar ban pynthikna ïa ka jingdon ki nongtrei kiba biang bad ban pynbiang dawai ha baroh lai tylli ki Dispensary kiba don hapoh ka Block.
Haba pyntip ba ka Meghalaya ka pynlut palat T.3500 klur man ka snem ha ka pule puthi, ha kaba palat T.2000 klur la mang tang na ka bynta ka tulop, u Myntri Rangbah u la pynpaw ba 4,500 tylli ki skul ba la ïarap da ki riew shimet ki ïoh jingïarap T.1000 klur.
“Ban pynbha ïa ka jingtreikam bad ban pynthikna ïa ka jingïaryngkat, ka Sorkar kan pynbeit thymmai ïa ki grant na ka bynta ki skul Adhoc bad SSA bad ruh kan pynbeit ryntih ïa ka jingpynïapher ïa ki skul ban pynkhlaiñ ïa ka jingai jinghikai kaba bha,” u la bynrap.
“Bun ki skul ha ki thaiñ nongkyndong ki treikam kum ki ‘Multi-purpose Institutions’ kiba shakri ïa ki kyrdan LP, UP, bad Secondary. Ka jingthmu jong ngi ka long ban pynbeit bad pynkhlaiñ ïa kum kine ki jaka pule ban pynthikna ïa ka jinglah ban ïoh ïa ka pule puthi kaba bha ha man la ki kyrdan,” u la ong.
Haba ïadei ka ‘Early Childhood Development’ (ECD), u la pyntip ba ka ECD Mission jong ka Sorkar ka ai ïa ka rukom treikam kaba pura, kaba ïadei bad ka jingim naduh ki snem ba dang rit haduh ka jinglong samla, kaba kynthup ïa ki jingdonkam ha ka koit ka khiah, ka jingbam, bad ka jingpule.
Ki nongrep ki la pynpaw ïa ki jingsngewkhia halor ka jingdonkam ïa ki symbai bad ki tiar rep, ha kaba u Myntri Rangbah u la pynbna ba yn pynïar ïa ka jingtreikam jong ka skhim CM FARM+ bad CM SEEDS, bad yn ai pisa shuh-shuh ban kyrshan ïa ki kam rep ba bunjait.
U Conrad u la ong, “Ki jingai jingmut ba kordor bad ka jingïatreilang ka pynlah ïa ngi ban shakri kham bha ïa ki nongshong shnong ka jylla, ryngkat, ngin tei ïa ki shnong kiba kham khlaiñ bad pynthikna ba man la ka longïing kan ïoh jingmyntoi na ki jingpyrshang jong ngi.”
