Shillong, Risaw 30
Ka President jong ka ri India ka la thung ïa u Justice Surya Kant kum u Chief Justice of India ban wan bad ïa ka jingpynbna shaphang ka jingthung ïa u la bthah da ka tnat Justice, Sorkar India. U Justice Surya Kant un shimti kum u Chief Justice of India ha ka 24 tarik u Naiwieng, 2025.
La kha ïa u ha ka 10 tarik u Rymphang, 1962 ha ka shnong Petwar, kaba don ha Hisar distrik, Haryana. U la ïoh ïa ka Law degree na Maharishi Dayanand University, Rohtak ha u snem 1984 bad u la sdang treikam ha une u juh u snem ha District Courts, Hisar.
Ha u 1985, u la leit noh sha ka Punjab and Haryana High Court, Chandigarh, ha kaba u la pyntbit ha ki kam kiba ïadei bad ka Riti Synshar, ki jingshakri bad ki kam paidbah. Ha ka 7 tarik u Naitung, 2000, u la long u Advocate General ba dang khynnah tam jong ka Haryana bad u la ïoh ruh ïa ka kyrdan Senior Advocate. U la trei kum u Advocate General haduh ba u la shah kyntiew kyrdan sha u Nongbishar jong ka Punjab and Haryana High Court ha ka 9 tarik u Kyllalyngkot, 2004.
Kum u Nongbishar, u la trei ha ka Governing Body jong ka National Legal Services Authority (NALSA) naduh u 2007 haduh 2011 bad u la ïoh ïa ka First Class First ha ka Master’s degree in Law jong u ha u 2011. U la shah thung kum u Chief Justice jong ka Himachal Pradesh High Court ha ka 5 tarik u Risaw, 2018 bad hadien kane u la shah kyntiew sha ka Supreme Court of India ha ka 24 tarik u Jymmang, 2019. Naduh ka 14 tarik u Jymmang, 2025, u la long u Executive Chairman ka NALSA bad u don ruh ha ki komiti bapher bapher jong ka Indian Law Institute.
Ha ka jingtreikam kaba sawphew snem, u Justice Surya Kant u la bishar da ki hajar ki case, u la wanrah ïa ki jingbatai bad ai ki rai kiba kyrpang. Naduh ki kam Riti Synshar kiba jynjar haduh ki jingujor kiba ïadei bad ki hok jong ki briew, ka kam jong u Justice Surya Kant ka dei ka dak jong ka jingpynïasoh ïa ki kam kiba ïadei bad ka aiñ bad ruh ka jingsngewlem, ka jingtbit ha ka pule puthi bad ka jingtrei shitom na ka bynta ka aiñ.
