Shillong, Risaw 30
Ka kynhun jong ki runar kaba ym lah ban ithuh, ka la tied bad bom ïa ki ar ngut ki samla haduh ba ki la mynsaw bad la hap ban pynkit noh sha ki jaka ai jingsumar.
Katkum ka khubor kaba la ïoh na ki pulit la ong ba kane ka jingjia shah tied shah bom jong ki ar ngut ki samla kiba la tip kyrteng kum u Banniew Thabah ba dang 21 snem bad u Korborlang Marbañiang ba dang 24 snem ka la jia ha ka miet jong ka 28 tarik mynta u bnai ha ka por kumba 9.30 eiei.
La ong ba kane ka kynhun ki runar kaba don kumba khatar ngut eiei ba kynthup ruh ïa kawei ka kynthei, ka la tied bad bom ïa kitei ki ar ngut ha lum jingtep kaba don ha Lawmali, Shillong bad ban phet krad bak hadien ba la dep ban shoh. Ha kane ka jingjia, ïa kine ki ar ngut kiba la mynsaw la pynkit noh sha Civil Hospital Shillong ban pynïoh ïa ka jingsumar.
Ka jingtohkit jong ki pulit ka dang ïaid shakhmat ban tip ïa ka daw tynrai bad ruh ban lap dien ïa kitei ki runar kiba la donkti.
Ha kawei pat ka jingjia, kaba la jia ha ka 28 tarik mynta u bnai ha ka por 10 baje mynmiet, ki pulit ki la ïoh jingtip ba uwei u briew ba la tip kyrteng kum u Brightstar Pyngrope, la kynnoh ba u la shoh ïa uwei u briew uba la tip kyrteng kum u Tipborlang Shadap (23 snem) ha Ksehpyndeng Mawryngkneng ha East Khasi Hills.
La ong ba ha kane ka jingshah shoh, une u briew u la mynsaw bad la pynkit noh sha CHC Mawryngkneng bad nangne la phah pynkynriah noh sha Civil Hospital Shillong.
Ha kawei pat ka jingjia shah shoh, kata ha ka janmiet jong ka 27 tarik mynta u bnai, ki pulit ki la ïoh ka jingtip ba ki runar bym lah ban ithuh, ki la shoh ïa ki ar ngut ki briew ba la tip kyrteng kum Julash Arengh bad Hendro M Sangma, bad nalor ba ki la shoh ïa kine ki arngut, ki runar ki la pynjulor ruh ïa ka kali auto-rickshaw (ML08-J-2314) bad ruh ïa kawei ka arshaka kaba la jia ha Rongkhon Songgittal, Tura ha West Garo Hills.
