Shillong, Risaw 30
Ka Sports Authority of India (SAI), STC, Shillong kan pynrung ïa ki khynnah ïalehkai kiba kynsai ha ki hynriew tylli ki jait jingïalehkai ki ban hap hapoh ka ‘residential’ bad ‘non-residential scheme’ kiba kynthup ïa ka Archery, Athletic, Boxing, Football Judo bad Karate.
Ïa ka prokram jied na ka bynta ki khynnah yn pynlong ha ka 12 bad 13 tarik u Naiwieng mynta u snem ha SAI Training Centre kaba NEHU bad ki khynnah ki dei ban wan ai jingtip ha ka por 8 baje mynstep.
Na ka bynta ka Archery, Athletics, Boxing bad Judo kan dei na ka bynta ki ‘residential scheme’ kynthei bad shynrang, katba ka Football kan dei na ka bynta ka ‘non residential scheme’ tang ki shynrang bad ka Karate kan dei na ka bynta ka ‘residential scheme’ tang na ka bynta ki khynnah kynthei.
Kat kum ka kyrwoh ba la pyllait da u Assistant Director katei ka shlem ai jinghikai u R.K.Mishra, u la ong ba ka rta jong ki khynnah ka dei naduh 12 haduh 18 snem. La ong ba ka jingjied ïa ki khynnah kan long katkum ka jinglah bad ka jingïashim bynta jong ki ha ki lympung ïalehkai ba la ïoh jiingithuh kum ka Inter National, National, State bad District Level, kumjuh ruh lyngba ka jingpynlong ïa ki tes katkum ka rta lem bad ki jingtbit jong ki.
La kyntu ïa ki khynnah ba ki dei ban wanrah ryng-kat bad ar tylli ki dur passport size ba dangshu shon shem ryngkat ka Aaddhar card bad ki kot ki sla ki ban pynshisha ïa ki snem kha jong ki.
