Shillong, Risaw 31
Kumba 21 ngut ki briew ba kynthup ïa ki khynnah rit, la ïoh ban pyllait im noh hadien ba u paidbhur uba don kumba 200 ngut eiei, u la leit ban tur bad ker kut ïa ka ïingsah sah jong u Bah Ham Shangpliang kaba ha Khliehshnong, Sohra ha ryngkat ka byrngem-byrsit ban pynpra bad thang ruh ïa ka ïingsah jong u namar ka jingsuba menshohnoh.
Katei ka jingjia kaba la jia ha ka miet Sngi Palei ka la mih na ki jingkynnoh menshohnoh da uwei u khynnah rit uba la kam ba u la ngat ha ka jingleh sniew u Bah Shangpliang.
Haduh mynta, la kem ïa 9 ngut ki briew kiba la pynithuh kum ki nongpynshit paidbah bad katkum ka jingong ki pulit, la khmih lynti ba kin dang don shuh ki ban shah kem haba ïadei bad katei ka jingjia.
Ka jingtohkit kaba sdang kaba la leh ha katei ka jaka ka pyni ba katei ka jingjia ka la mih na ki jingkynnoh da uwei u khynnah rit uba la kynnoh ba u don “ki jingïohi paw” ïa u Bah Ham Shangpliang bad ngeit ba u la ngat ha ka jingshah leh sniew ha une u briew, la ïathuh ki pulit.
Kine ki jingkynnoh ki bym lah ban pynshisha bad ki bym don nongrim i-kumba ki la wanrah ïa ka jingsheptieng, ka jingkulmar-jingmut, bad kaba la pynlong ïa u paidbah ban lum ban lang hapdeng ki katto-katne ki nongshong shnong, kaba la poi pat sha ka jingïalum briew kaba be-aiñ bad ki jingbyrngem kiba shyrkhei, ki la ong.
Ki kynhun pulit bad ki majistor na Sohra mar-mar ki la her sha katei ka jaka, ha ryngkat ka jingpyndonkam ïa ki tyndong lyer pynsat khmat bad ki bom ‘stunt grenade’ ban pynpra ïa u paidbhur bad ban thaw ïa ka lynti kaba shngaiñ na bynta ka jingpynkynriah.
Ha kajuh ka por, la donkam ruh ïa ki pulit na Shillong ban tem ïa ka jinglong-jingman jong katei ka jingjia.
Lyngba ka jingïatreilang jong ki pulit bad ki majistor, la lah ban pynkynriah noh ïa ki 21 ngut ki briew, kynthup ïa ki khynnah rit, kiba la ïoh ban pyllait im bad ba la pynkit noh sha Shillong Civil Hospital na bynta ka jingpeit bniah.
Ha katei ka jingjia, ki don 8 ngut ki pulit kiba la mynsaw.
Na ka liang ki pulit, ki la kem ïa 9 ngut ki briew kiba la pyithuh kum ki nongpynshit paidbah, bad la khmih lynti ba kin dang don shuh ki ban shah kem haba ïadei bad katei ka jingjia kaba la pynngat mukotduma ha Sohra Police Station.
