Nongstoin, Risaw 31
Ha ka sngi Thohdieng jong ka taïew ka shlem treikam jong u Supritendent of Police ka West Khasi Hills shi bynta ban kynmaw burom ïa ka 150 snem ka jingdap sngikha u Sardar Vallabhbhai Patel, ka la pynlong ïa ka Unity Run bad ka jingshim smai (Pledge Taking) hapoh ka jinglamkhmat jong u Superintendent of Police bad ki Additional SPs.
Ha kane ka jingïalang la ïashim bynta da palat 200 ngut ki paidbah, ki khynnah skul bad ki pulit, kiba la pynpaw ïa ka jingkular jong ki ban bat ryntih ïa ka jingïatylli, ka jinglongtrai bad ka jingshngaiñ jong ka Ri India.
Shuh-shuh ha kane ka sngi la pynlong ïa ka Unity Run bad ka jingshim smai naduh ka 29 tarik Risaw ha man ki Police Station bad la pynkut da ka jingïalang ha ka District Headquarters, Nongstoin kaba la pynïaid da ka ophis jong u Superintendent of Police, WKH.
Ka jingïalang ka la sdang da ka jingshim smai paidbah, hadien pat la pynlong ka jingïamareh (Unity Run) kaba jngai 5 KM ha kaba ki paidbah na ki dong bapher-bapher jong ka thain ki la wan ban sakhi ban ïashim bynta ha katei ka sngi.
Shuh-shuh ha kane ka sngi la pynkut ïa kane ka jingïalang da kaba pynkup burom ïa ki nongïashim bynta bad da ka jingleh burom kaba pyni ïa ka jingïalong shitylli bad jingïajan hapdeng ki nongwan ïashim bynta, bad ka jingkitkhlieh kaba skhem hapdeng ki pulit bad ki paidbah.
