Shillong, Risaw 31
U Babu Kular Khongjirem u ba dei u nonghikai ba la Rangbah bha ka skul KJP Girls’ Higher Secondary School u la dawa na ka Sorkar Jylla, ba ka dei ban pynbeit kyrkih ïa ki jingbakla hapoh ka ‘CM Impact’ ba la sam sha baroh ki skul, ba kan ym long ka jingïalam bakla ïa ki khynnah pule bad ba ki khynnah pule kin ym sngew artatien.
U Babu Kular u la pynpaw ba u sngewkhia halor ka jinglap jong u ba ka CM impact kaba la pynmih da ka tnad pule puthi ka Sorkar Jylla bad la sam sha ki skul bapher -bapher na bynta ki khynnah ban ïaleh matrik namar ba ka don shibun ki jingbakla.
Haba kren sha ki nongthoh khubor u la ong ba, ha kine ki sngi u la pyrshang ban peit kumba 10 tylli ki jingkylli jong ka CM Impact, hynrei kaba sngewsih ka long haduh 3 tylli ki jingkylli ki ai ïa ka jubab kaba bakla bad kaba ym ïadei katkum ka kot ba ki ai jinghikai hapoh klas.
Halor kane ka jingbakla ka jingai jubab katei ka kot ba la pynmih da ka Sorkar ka pynlong ïa ki khynnah ba kin kulmar jingmut bad artatien haba jubab ïa ka jingkylli haka por ba kin leit thoh exam.
U la pynpaw ruh ka jingsngewkhia haba ïadei ba ka Sorkar ka sam ïa ka CM impact tang ïa ki khynnah ki ba don ha ki skul, katba ki khynnah ban ïakhun matrik ‘irregular’ haduh mynta kim pat ïoh.
U la ong ruh ba, ha ka snem ba ladep ki khynnah ki pynpaw ba ki sngewtynnad ban rah ha ki kti jongki ïa ka kot kaba don ka dur u Myntri Rangbah ka Jylla, katba mynta u snem pat ki khynnah ki pynpaw ba ki sngewlehraiñ ba kat ka kot ba don ka dur jong u Myntri Rangbah ka Jylla ka ba don jingbakla bad u la ong ba ka long ka jinglehraiñ ruh ïa ka Jylla Meghalaya.
Namar kata u la kyntu jur ïa ka Sorkar ba ka dei ban pynbeit mardor ïa kine ki jingbakla, khnang ba ki khynnah kin sngewshngaiñ bad sngew ïoh mynsiem haba ki leit ban thoh eksam.
