Shillong, Risaw 31
Ka Khasi Stident Union (KSU) Mawphlang unit ha ryngkat bad ka Sohiong Circle ha ka 31 tarik u Risaw 2025, ki la leit mih hapoh ka ophis treikam ka Inclen Somaarth kaba don ha Mawngaprim, halor ka jingbym shym la ïoh tulop ki samla ba trei ha katei ka ophis, wat haba la kut ka jingïateh ne kontrak naduh u bnai Nailar (August).
Ka jingleit mih ki dkhot ka seng sha katei ka ophis ka dei hadien ba la ïoh ka jingujor na ki samla Khasi kiba trei ha katei ka ophis, ba kim pat ïoh ïa ka tulop jong ki haduh mynta ruh.
Ha ka jingleit mih, ka seng ka la pan jingshai na u Station Manager jong katei ka ophis halor ka jingslem ban siew tulop sha ki nongtrei wat hadien ba la kut ka kontrak ruh.
Ka seng ka ong “Kitei ki nongtrei wat haba ki la ju pynpaw bunsien ïa ka jingeh jong ki namar ka jingslem ban ïoh ka tulop naduh u bnai Nailar (August) hynrei u tei u manager um shym la patiaw ei-ei”.
Kumta ka seng ka la ong ba na ka liang u Station Manager u la pynshai ba dei ba ka don ka shuti puja bad namar ba don ki nongtrei kiba shim shuti kiba dei ban leh ïa ka tulop.
Kumta u tei u Manager u la kular ha khmat ka KSU, ba yn sa siew dep noh ïa ka tulop jong ki tei ki samla Khasi kiba don bad ym duna ïa ka lai phew ngut ei-ei ki bym pat ïoh tulop haduh mynta.
