Shillong, Risaw 31
U Myntri Rangbah ka Jylla, u Conrad K. Sangma ha ka Sngi Thoh-dieng u la pynbna ïa ki jingpynkhreh na ka bynta ka ‘Cherry Blossom Festival – 2025’, kaba la pynbeit ban long ha Madan Polo ha ka 14 bad 15 tarik u Naiwieng.
Ha kane ka tamasa, yn ïashim bynta da ki ‘riew donsap ba pawnam ka pyrthei, kynthup ïa ka kynhun tem ‘Rock’ na Ireland – ‘The Script’, u khlur ‘R&B’, u Jason Derulo, u DJ Diplo uba la jop la 3 sien ïa ka khusnam ‘Grammy’, ka kynhun rwai ‘Pop’ – ka ‘Aqua’, bad ka puron ka Bollywood, ka Nora Fatehi.
Kane ka tamasa kan ai burom kyrpang ruh ïa u nongrwai ba pawnam, u Zubeen Garg ha ka sngi kaba ar, ka ban ïashim bynta da ki nongput-nongtem kiba ïajan bad u, ba kynthup ïa ka Zublee, Priyanka, Prabin, bad Arupjyoti.
Ki ‘riewdon sap na kylleng ka thaiñ kum ka Meba Ofilia, ‘Dappest’ bad ‘adL’, ka kynhun tem ‘Rock’, ka ‘Girish and the Chronicles’, bad ka ‘Arius’ ruh kin ïashim bynta lang ha kane ka tamasa.
Ka tamasa kan wanrah ruh ïa ki prokram kiba bun jait, kynthup ïa ka jingïakob ‘Mr and Ms Cherry Blossom’, ‘Cosplay’, ka jingïalehkai khun kti jong ka ‘Cherry Blossom’, bad kiwei-kiwei.
Ïa ki tiket lah ban ïoh lyngba ka ‘online’ bad ha ki ‘Box Office’ ha nongbah Shillong.
Haba kren sha ki lad pathai khubor, u Myntri Rangbah ka Jylla u la pynpaw ïa ka jingkmen jong u, da kaba ong, “Nga sngewkmen ban pynbna ïa ka jingpynbeit kaba pura na ka bynta ka tamasa ‘Cherry Blossom 2025’. Ka tamasa mynta u snem ka kular ban long ka jingrakhe kaba khraw na bynta ka put ka tem, ka sap ka phong, bad ka kolshor kaba pyni nam ïa ka jingriewspah jong ki bynta bapher-bapher jong ka Jylla jong ngi.”
Ka tamasa ‘Cherry Blossom’ ka la ïoh ïa ka jingithuh ha kylleng, ha kaba ka la ïoh rah ruh ïa ka khusnam ‘Golden Banyan Award’ na bynta ka ‘Best Cultural Music & Dance’ ha ka ‘The Week Heritage Awards 2025’ bad ar tylli ki khusnam ksiar ha ka ‘WOW Awards Asia 2025’.
U Sangma u khmih lynti ba palat 50,000 ngut ki nongjngohkai pyrthei kin wan sha kane ka tamasa, da kaba ong, “Ngi kyrmen ba ngi dei ban tam palat ïa 50,000 ngut ki nongjngohkai pyrthei…nga kren shaphang ki nongjngohkai pyrthei kiba nabar, kiba sah miet.”
Ha kaba ïadei bad ki jingeh ha ka leit ka wan bad ka jingdheng kali, u Sangma u la ong, “Em, ka jingdheng kali kam dei tang mynta, ka dei naduh kine ki 50 snem ba la dep ba ngi la ïohi…ngin khang ïa ki jaka ba ju ïaid kali bad ngin ym shah ïa ki kali ban ïaid palat ïa kaei kaba la buh bad yn khang ruh na ka bynta katto-katne por.”
Ka Sorkar ka la bei tyngka ha ki jingpynroi ïa ki jingtei, kynthup ïa ki jaka pynïeng kali, ban pynduna ïa ka jingkhapngiah ha Sor.
U Sangma u la ban jur ba ki kam jngohkai pyrthei ki dei ka jingïaid lynti bad ka donkam ïa ka jingkylla kaba bteng, da kaba ong, “Ka kam jngohkai pyrthei ka dei ka jingïaid lynti, phi donkam ban nang kiew shaphrang…ngi sngew ba ngi la kham bha ban ïa ka kaei kaba ngi long mynshuwa bad kiei-kiei ki la nang manbha bad ki kam ki jam ki la kiew.”
La khmih lynti ruh ba kane ka tamasa kan kyntiew ïa ka ïoh ka kot jong ka thaiñ.
“Ngi khmih lynti ba ki nongjngohkai pyrthei kin wan bad ba kin shang kai kylleng, leit sha ki katto-katne ki jaka jngohkai pyrthei, pynlut por kham bun bad kata kan ai jingmyntoi ïa ki nongshong shnong jong ka Jylla jong ngi,” la ong u Sangma.
