UN, Risaw:
Ka ophis jong ka UN kaba dei khmih halor ka hok longbriew- manbriew, ka la pynrem jur ia ka jingleit khynra jong ki pulit ia ki nongkhaïi droks ha Rio de Janeiro, kaba la wanrah ia ka jingiap jong ki 64 ngut ki briew ha katei ka jingjia, ha kaba, ka UN ka la bthah ba dei ban phah tohkit bniah bad ban phah tohkit noh mardor haba iadei bad kane ka mat.
La ong ba palat 2,500 ngut ki bor pahara kiba kit ia ki tiar siat, ki la iashim bynta ha katei ka jingkhynra kaba la thmu ia ka kynhun khaïi droks ba shyrkhei jong ka Brazil ha ki ar tylli ki jaka ba duk ha ka thaiñ Shatei Lam Mihngi jong ka nongbah.
Ki kam pulit kiba heh ki ju jia man ka por ha Rio, kaba long ka jaka jngohkai pyrthei ba paw nam bha jong ka Brazil, khamtam ha ki jaka ba marjan, ki jaka ba duk bad kiba bun briew kiba ju synshar da ki kynhun runar.
Ha katei ka jingleit khynra, la ong ba ki bor pahara ki la kem noh ia 113 ngut ki briew, kiba la ngeit ba ki long ki runar nong khaïi droks ba shyrkhei, la ioh kurup ruh haduh 118 bad la ioh kurup ruh bun ton u droks.
Kane ka jingleit khynra ka la pynkhihwin ia katei ka thaiñ bad ki shnong, ki thaiñ ba marjan, ha kaba la khang khyrdep noh wat ia ki skul bad jaka pule kiba don hajan jong katei ka thaiñ bad ia ki bos la pyndonkam ban khang kut ia ki surok.
Ka Rio ka la ju sakhi ia kiba bun ki jingshah khynra kum kine naduh ki snem ba la leit. Ha u Lber jong u snem 2005, 29 ngut ki la khlad ha ka jingkhynra ha ka thaiñ Baixada Fluminense, kaba long markhap bad ka nongbah Rio. Kumjuh ruh ha u Jymmang jong u snem 2021, 28 ngut ki la iap ha ka jingleit khynra hapoh Jacarezinho Favela.
Watla katta, ka jingdon kiba khlad bad kiba mynsaw ne shah kem ha katei ka jingleit khynra ha kane ka sien, ka long ka bym shai. Hynrei la sngewthuh ba ka jingdon kiba khlad ka la bun bad palat bun shah ia kaba long ha ki snem ba la leit bad kumta kane ka jingleh jong ki bor pyniaid ka Brazil, ka la wanrah ia ka jingpynrem jur na kiba bun ki tnat ba dei khmih jong ka pyrthei.
Ha ka step Sngi Palei, la ong ba ki bor pyniaid jong katei ka thaiñ ki la ialum lang ha Penha, hapoh ki headquarter jong ka seng CUFA na Favela, ban ia pyrkhat halor ki lad jingïarap sha ki longïing jong kito kiba ngat bad kiba khlad ha katei ka jingjia.
Katba, kiba bun ki dukan ki dang khang khyrdep bad ka jinglong- jingman ha katei ka thaiñ ka dang deit-thah bad shongsyier hi kumjuh kumba long ha ki sngi ba la leit.
