Jowai, Risaw 31
Uwei u briew ïa uba tip kyrteng u Heisniawmi Papiah uba ju khot sin ‘Pot’, 35 snem rta, la suba jur ba ula shah pyniap dusmon ha ki briew bym lah satia ban ithuh ha khlaw ha shnong Myntkung, West Jaintia Hills District.
U Heisniawmi Papiah udei na ka shnong Thadmuthlong Rim, West Jaintia Hills District bad u shong bylla ot phlang bam masi bad uwei u trai ha Myntkung.
Ïa ka met ïap ba la pyut jong u Heisniawmi Papiah la lap ha ka nohphai sngi jong ka 29 tarik Risaw ha katei ka khlaw.
Ki pulit kiba la ioh jingtip halor kane ka jingjia, kila hiar mar mar sha katei ka jaka bad pynlong ruh ïa ka Spot post mortem ha katei kajuh hi ka jaka.
U Waheh shnong ka Thadmuthlong Rim Bah Emhi Kanai, haba pyntip halor kane, ula ïathuh, kaba pynsuba jur ïa ki bahaiing ba u shah pynïap dusmon, dei namar ba ïa ka met ïap la tap da ki sla dieng bad sa ban da ki maw.
Shuh shuh u Bah Emhi Kanai ula ïathuh ba ïa u Heisniawmi Papiah la iohi khatduh ha ka step 22 tarik Risaw ha Mynktung, katba u dang bud ïa ka masi kaba lait na sem, hynrei shiteng lynti kane ka masi kala kum tyngkhuh ïa kawei ka Scooty kaba pynieng harud surok, bad naduh katei hi ka sngi um shym la wan phai iing shuh.
Halor kane ka jingjah, u Waheh shnong ula ïathuh ba na kaliang ki bahaiing hasem ki khlem ujor ejahar ne wad ïa u namar ki pyrkhat ioh ba u sah sha jaka bylla lane u leit bylla ot kba artad ba dei ka por ot kba, bad ruh na ka liang u trai masi u dang pyrkhat ïoh ba u sah sha ïing sha Thadmuthlong rim.
Hynrei tad ha ka nohphai sngi jong ka 29 tarik Risaw la lap pynban ïa ka met ïap ba la pyut jong u na ka khlaw ha Mynktung.
Ki bahaïing hasem ryngkat ka shnong Thadmuthlong rim kila kyrpad ïa ki pulit ban pynlong ka jingtohkit bnïah bad ban thwet ïa ki briew kiba donkti ban leh ïa kane ka kam pyntriem.
Ïa ka nïam ka rukom kaba khatduh la pyndep ha ka 30 tarik Risaw.
