Shillong, Risaw 31
Ka Sorkar Jylla ka la ïoh ban sdang bad ban plie ïa Shillong Government College of Engineering hadien ka jingioh jing-mynjur na ka All India Council for Technical Education AICTE ban plie ïa katei ka jaka ai jingtip ïa ki samla pule.
Ha ka jingplie paidbah ïa ka samoi long klas ba nyngkong eh jong ka Shillong Government College of Engineering ha ka College campus ha Mawlai Kynton Massar, Shillong. U Myntri Rang -bah ka Jylla u Conrad K Sangma u la long kum u kongsan ha kaba la ïadon -lang u Symbud Myntri Rangbah ka Jylla u Bah Prestone Tynsong, u Myntri ka Pule Puthi u Bah Lahkmen Rymbui, Myntri ka Tnad Arts & Culture u Bah Sanbor Shullai, u Chief Secretary Dr Shakil Ahammed bad kiwei kiwei.
Haba ai jingkren, u Myntri Rangbah u la shim ba ka dei ka sngi ban sah khana ïa ka Meghalaya, da kaba ong ba ha ki snem ban wan, ki briew kin kynmaw ïa kane ka sngi ka jingsdang jong ka Government Engineering College.
U Myntri Rangbah u la ong ba ka teknoloji kan ïarap ïa ka Meghalaya ba kan kiew shaphrang ha ka roi ka par, kumba leh ka India ha ka Banking Sector lyngba ki buit treikam kum ka UPI bad Aadhaar.
Ha ka jingkren jong u la pynpaw ba, la don u Engineer Khasi ba dang khynnah na Shillong, uba la shna dalade ïa ka software ba pyndonkam ban pynkynriah ïa ka S/4HANA System, kaba shongdor $10 billion, da kaba pynrung lang ïa ka “Speed of Light” concept ka Nvidia ban pynduna ïa ka por leh test na ka shisnem tang da ki bnai. U la bynrap ba ki heh Ophisar na Nvidia ki la dep wan sha Shillong ban tyrwa ïatreilang bad pynheh ïa kane ka kam.
U la pynbna ruh ba ka jinghikai ïa 50 ngut ki samla ka la sdang, da ka jingthmu ban nang pynrung shuh-shuh ki ba shah hikai sha ka 200-300 ngut, kane ka kabu kan plie lad ïa ki samla ka Jylla ban tip shuh-shuh haba ïadei ka Artificial Intelligence, Computing bad Engineering.
Ha kane ka sngi, u Myntri Rangbah ula plie ruh ïa u maw kyrteng kum ka dak ka jingplie ïa kane ka samoi long klas bad ruh u la plie ïa u Maw Nongrim ban shna ïa ka RCC building ba thymmai ha Shillong Polytechnic.
Kane ka projek ka kynthup ïa ka workshop, laboratories, examination centre, smart classroom, teachers rooms, kaba la bei tyngka da ka NEC hapoh ka DoNER Minister ka Sorkar India.
U Myntri Rangbah ka Jylla u Conrad k Sangma u la pyntip ba ka Shillong Medical College ka long kaba la khreh ban plie noh bad ka dang ap ïa ka jingpynthikna la ka long na u Myntri Rangbah Duh ka Ri la lane u Myntri kam Pohïing ba un plie ha kine ki khyndiat taïew ban wan.
