Jowai, Risaw 31
Ka School Managing Committee jong ka St. Michael & All Angels Secondary School, Jowai ha ka 30 tarik Risaw ka la pynkut noh ïa ka jingrakhe dap 25 snem ne Jubili Rupa (Silver Jubilee Celebration) ka jingïaid lynti jong ka skul ha ka liang ka jingnang jingstad bad ka pule ka puthi.
Ha kane ka sngi la donlang u Bah Paia Da O hi Lhuid, Executive Engineer, PWD Building, West Jaintia Hills kum u kongsan, ki riew rangbah ka Balang, ki longkmie longkpa, ki nonghikai bad ki khynnah skul.
La sdang ïa ka jingïalang da ka jingpule ïa ka Ktien U Blei da u Rev. L. Khongthohrem, ka jingkren pdiang burom na u Rev. Dn. N.W. Lyngdoh bad ka khana lyngkot shaphang ka jingïaid lynti ka skul na u Mewothi Gatphoh, Headmaster.
Ha kane ka sngi la pynkup burom ïa ki 2 ngut ki nonghikai ba nyngkong jong ka skul bad khynnah skul ba nyngkong eh ban ïakhun ïa ka SSLC Examination ha u snem 2011.
Ka Dr. Harshada Lamin, MBBS MS/MD obstetrician and gynecologist kum kawei na ki khynnah skul ba nyngkong ha ka jingkren ka la pynpaw ka jingsngewnguh ïa ki bor pynïaid ka skul, ki nonghikai kiba ka la ioh shibun ki jinghikai bad ka la kitbok kitrwïang ba kane ka skul kan nangkiew na uwei u snem sha uwei pat.
U Bah Paia Da O hi Lhuid, EE-PWD ula ong ka jingïaid lynti ban kynjoh sha une u mawmer ba 25 snem dei ka jingïatreilang, kumta ula kitbok kitrwïang ïa ka skul ba ha ki snem ban wan kan long ka shlem ai jinghikai ka ban sei bad pynmih shibun ki khynnah kiba lah ban rah nam ïa ka skul ha ki liang bapher bapher. Kum ka dak ban pynsah jingkynmaw ïa ka jingrakhe Jubili Rupa, u Bah Paia Da O hi Lhuid ula pynlait paidbah ruh ïa ka Silver Jubilee Souvenir.Ïa kane ka sngi la pynphuh pynphieng da ki jingïalehkai pynbyrngïa kumjuh ki jingshad jingrwai ba la shim bynta da ki khynnnah bad nonghikai.
