Shillong, Risaw 31
Ka Rangdajied United ka la rung sha ka semifinal jong ka SSA Super Cup ba nyngkong eh jong ka SSA Super Cup 2025 da kaba jop da 3-0 kol pyrshah ïa ka Nangkiew Irat ha ka playoff ba nyngkong ha madan SSA First Ground, Polo, hynne ka janmiet jong ka sngi Thohdieng ka 31 Risaw 2025.
U Benny V Khriam u la thep ïa ka kol ha ka minit kaba 36 hadien ka jingïarap pashat bol jong u Pasborlang Khonglikong. Nangta u Dibormi Kassar (73’P, 85’P) u la thep ar tylli lyngba ki penalty ha ka kylla miet.
Ka SSA Super Cup, kaba la pynlong da ka Shillong Sports Association, ka bynrap sa kawei pat ka kyrdan jong ka jingïakhun bad ka jingkmen ïa ki riew ieid ïa kane ka jingïalehkai, ha kaba ki Top 6 na ka Shillong Premier League 2025 ki ïakhun ïa ka ha ka knockout tournament. Ka Nangkiew Irat bad ka RUFC ki la don ha ka kyrdan kaba saw bad kaba san ha ka SPL bad ki la ïakhaid ïa ka jingïakynduh jong ki ha kata ka league da 1-1 kol ha ka 5 tarik Nailur.
Ka Rangdajied kan ïakhun pyrshah ïa ka Langsning ha ka semifinal ba nyngkong ha ka 7 tarik Naiwieng. Kum ki nongjop jong ka Shillong Premier League 2025, ka Langsning bad ka kynhun ba wan ba ar ka Shillong Lajong ki la rung beit-beit sha ka semi-final.
Ki la don katto-katne ki ‘corners’ ha ka shiteng kynta ba nyngkong jong ka jingïalehkai hynrei baroh arliang ki la long kiba husiar bha, haba kheiñ ïa ka jingdonkam jong ka jingïalehkai.
Ka ‘cross’ kaba la wan na ka liang kadiang ka la shah pynphai kylla da u Pasborlang hadien ba u nongap kol jong ka Nangkiew Irat u Akash Thapa um shym la lah ban poi sha ka bol bad la phah sha ka liang jong u Benny, uba don ka jar kaba plie lad ban un thep kol.
Ki ar tylli ki kol ha ka kylla miet baroh ar ki dei ki jingmih na ki ‘foul’ ha ka phyllaw kol. U Kitdorlang L Nonglait u la long u nongleh bakla ba nyngkong eh haba u la khynniat ïa u Pasborlang, katba u Dibinroy pat u la tan noh ïa u Dibormi tang katto-katne minit na ka jingput kaba khatduh.
Na ka bynta ka jingtrei shitom jong u ha ka liang ïada bad ha pdeng, u Mebanshngain Kurkalang u la ïoh ïa ka nam ‘T7 Player of the Match’ bad ïoh ruh ïa ka ‘memento’ bad ka cheque kaba T.5 hajar na u Working President ka SSA u Robert Dkhar.
Ha ka 01 Naiwieng 2025 ka Mawlai kaba wan ha ka kyrdan kaba lai jong ka SPL kan ïakhun pyrshah ïa ka Sawmer kaba wan ha ka kyrdan kaba hynriew ha ka por 5 baje janmiet. Ka kynhun kaba jop ha katei ka jingïalehkai ba kongsan kan ïakhun pyrshah ïa ka Shillong Lajong ha ka semifinal kaba ar.
