Shillong, Risaw 31
Ka lympung ïalehkai Meghalaya State Level Kickboxing Championship 2025 kaba 28 kaba la ap khmih lynti la sdang mynta ka sngi Thohdieng ka 31 tarik Risaw ha Laitkor Kynton U Mon, Meghalaya School Of Martial Arts (MSMA) Training Centre, Head Quarter, da ka jingkmen bad jingïashim bynta kaba khraw na ki nongïalehkai ha kylleng ka Jylla. Kane ka sdang naduh mynta ka 31 tarik u Risaw haduh ka 1 tarik u Naiwieng 2025 la pynlong da ka Meghalaya Association of Kickboxing Organisation (MAKO).
Ha ba plie ïa kane la lympung lehkai la sakhi ïa ka jingdonlang jong ki nongwan ba donburom, ki heh ki haiñ, ki coach, bad ki nongkyrshan kiba la ïalum lang ban ai mynsiem ïa ki samla bad kiba ‘riew don sap ïalehkai kickboxing kiba mihkhmat ïa ki Distrik bapher-bapher jong ka jylla Meghalaya. Kane ka jingïalehkai ka thmu ban kyntiew ïa ka mynsiem ïalehkai, ka jinglong ryntih, bad ka jingpynbiang ka met ka phad hapdeng ki samla, katba ka ai ruh ka lad ïa ki nongïalehkai kiba dang mih ban pyni ïa la ka sap bad ban ïoh rung sha ki jingïakop kiba kham shalor.
Haba kren ha kane ka jingplie paidbah, ki nongpynïaid ki la pynpaw ka jingsngewnguh ïa baroh ki kynhun kiba la ïashim bynta, ki referee, bad ki ‘official’ kiba la aiti bad dem-diap na ka bynta ban kyntiew ïa ka jingïalehkai kickboxing ha ka jylla. Ki la pynpaw ruh ïa ka jingpyrshang ba bteng jong ka MAKO ban pynroi ïa ki sap ba shapoh bad ban pynkhlain ïa ka jingdon jong ka Meghalaya ha kane ka kam lehkai ha ka ri bad kumjuh ha kylleng ka pyrthei.
Kane ka jingïakob kaba ar sngi kan don ïa ki kyrdan bad ki jingïakhun bapher-bapher, ha kaba ki nongïashim bynta kin ïakhun ban ïoh ïa ki takma bad ki burom jong ka jylla. Ki nongjop na kane ka lympung kin mihkhmat ïa ka Meghalaya ha ki lympung ïalehkai kiban sa wan hapoh ka lama jong ka National Kickboxing Federation (NKF) (NG).
Katba ki jingïalehkai ki dang ïaid shakhmat, ka jinglong jingman ha Laitkor Kynton U Mon,Meghalaya School Of Martial Arts (MSMA) Training Centre, Head Quarter ka dap da ka jingkmen, ka jingkut jingmut, bad ka mynsiem jong ka jingïalehkai hok-kaba pyni sa kawei pat ka mawjam ha ka jingïaid lynti jong ka Meghalaya kaba nangroi ha ka jingïalehkai ïalehkai ‘martial arts’.
