Shillong, Risaw 31
U Myntri Rangbah ka Jylla Conrad K Sangma u la pynksan ïa ka rai jong ka Sorkar Jylla ban pynlong ïa ki tamasa kynthup ïa ka Shillong Cherry Blossom Festival da kaba ong ba ki pynïohnong bha na kaei kaba la kynshew.
U la ïathuh ba ka Sorkar Jylla ka la ïoh ban lum haduh T.130 klur tam na ka jingkynshew ba T.20 klur ha ba pynlong ïa ki tamasa bapher-bapher jong u snem ba la lah, kaba pyni ïa ka jingmyntoi kaba khraw ha ka ïoh ka kot na ki tamasa.
“Kumba T.20 klur tam ne duna ngi la pynlut ha ki tamasa u snem ba la lah bad ngi la ïohnong jan T.130 klur tam. Kine ki dei ki jingkheiñ kiba shai kiba pyni ba ki concert bad tamasa ki dei kiba ïohnong bha bad ki la pynshisha ba ki lah ban aikam bad pynshisha ruh ba ki la rah ïa ka nam jong ka Jylla,” ong u Conrad haba ïa kren bad ki nongthoh khubor ha ka sngi Thohdieng.
Haba kren halor ki jingkynthoh ba ka Sorkar ka la shimkhia palat ïa ki tamasa ban ïa kiwei ki tnad, u Conrad u la ong “Haba ngi phai sha ki kam pynroi, ngi hap ban khmih ïa kiei-kiei baroh kiba ïadei bad ka roi ka par bad ngi mang ïa ka pisa ha man ki tnad bapher bapher bad leh ruh ïa ki kam bapher-bapher”.
U la kren ruh ïa ka jingkynshew ka Sorkar ha ki tnad bapher-bapher kynthup ïa ka pule ka dangle, ka koit ka khiah bad ki jingtei.
“Ka pule-puthi ka ïoh T.3500 klur na mang tyngka jong ngi. Ngi buh pisa ha man la ki tnad namar man la ki tnad ki hap ban kiew” la ong u CM.
U la ban jur ruh ba ki tamasa kum ka Cherry Blossom ka la noh synñiang shi kat dei eh ban pynpaw nam ïa ka Shillong kum ka jaka wan kai ki nongjngohkai pyrthei.
Shuh shuh u la ong “Mynta, ka Shillong ka dei kawei na ki jaka ba la ïa wad jingtip bha da ki briew ba kwah wankai namar ki tamasa bad ki prokram kum kine”
