Shillong, Risaw 31
U Babu Kular Khongjirem ula pynpaw ïa ka jingbym sngew ïahap halor ka jingpynmih hukum ba dang shen ka Sorkar Jylla, ba ka thmu ban set jingkylli hi na ka bynta ki klas VI haduh klas IX bad kane ka long kumba ka Sorkar kam shanñiah shuh ïa ki nonghikai.
Ïa kane u Babu Kular Khongjirem u ba long u nonghikai ka KJP Girls’ Higher Secondary School u la pynpaw ha ka jingïakren sha ki nongthoh khubor ha ka sngi thohdieng.
U la ong ba kane ka dei ka sien ba nongkong ba ka Sorkar Jylla ka leh ïa kane ban hukum ba baroh ki skul ba hapoh ka Jylla, ka Sorkar kan set jingkylli hi na ka bynta ka jingïaleh eksam ki khynnah ba ha ki klas VI haduh IX.
“Kane jingthmu ka Sorkar ka wanrah jingeh kylla ïa ki khynnah pule bad ïa ki nonghikai namar ka hukum, ka mih slem palat hadien ka shiteng snem bad bun ki skul kim pdiang ïa kane ka rai ka Sorkar namar bun ki skul kila shim klas ïa ki Syllabus naduh ka shiteng snem.”u la ong.
U Babu Kular u la ong ba ka jingleh ka Sorkar ka long kaba phylla namar barabor ka pyniaid exam ka MBOSE, hynrei mynta u snem ka Sorkar ka thmu ban pynïaid hi ïa ka eksam da kaba set jingkylli hi ïa ki subjek lyngba ka thad pule puthi jong ka Sorkar Jylla, kaba la ïaid lait ïa ka MBOSE kaba ju pynïaid ki exam bapher-bapher.
U la ong ruh, “Lada ka Sorkar ka pynïaid hi ïa ka eksam, ka dei ban don u ‘Controllers of Examination’ kumba don ka MBOSE bad lada ka long kumne ka MBOSE ka la duh noh ïa ka bor ba ka don ban pynlong ïa ki eksamin ba ha ki kyrdan bapher-bapher.”
Nalor kata u la ong ruh ba, ha shuwa kane ka MBOSE ka la pyrshang ban pynlong ka jingthoh eksam da kaba ka phah hi ïa ki jingkylli tang na ka bynta ka klas IX, hynrei tang arsnem ka kane ka jingpyrshang ka phiel namar ka hap ban leit sam lud ha baroh ki skul bad ka la kynduh jingeh ha kaba pynpoi ïa ki jingkylli bad ka la don ruh ka jinglait lypa ki jingkylli bad hadien jong kane ka MBOSE ka la pynkut noh ïa kane da ka jingkyrpang ki nonghikai.
Shuh-shuh u Babu Kukar ula ong, “ba lada ka Sorkar leh ha kane ka rukom, long kumba ka Sorkar kam don jingshahñiah shuh ïa ki nonghikai kiba hikai ïa ki khynnah skul”
“Lada ka Sorkar kam shanñiah ïa ki nonghikai bad ki skul ba kin pynlong eksam bad ban set jingkylli, sa phah noh da ki nongtrei ophis ban hikai, ngi ngin ym hikai, ai ïalad ïa ngi ba ngin leit noh sha ka kam ophis” la ong u Babu Kular.
U la ong ba, ki nonghikai ki kwah ba kin leh hi kumba la ju leh bad kaba ting ka long ba ïoh kane ka jingkwah ka Sorkar ïoh ka phiel biang kumba la phiel ka jingpyrshang ka MBOSE ha ki snem ba kham mynshuwa.
