Washington, Risaw:
Ka sorkar Trump ha ka Sngi Palei ka la pynbna ïa ka jingthmu ban pynduna noh bun shah ïa ka jingpdiang ia ki phetwir kiba leit ban rung sha US ha man la u snem bad ban kham ai jingmyntoi noh shwa nyngkong ïa ki nong South Africa, tang kiba dei ki doh lieh. Hapoh kane ka polisi ba thymmai, ka America kan pdiang tang 7,500 ngut ki phetwir ha u snem mang tyngka 2026, kaba hiar na palat 100,000 ha ka shi snem hapoh ka jingsynshar jong u president jong ka seng Democratic, u Joe Biden. Kiba bun na kito kiba shah pdiang ha ka snem mang tyngka kaba la sdang ha ka 1 tarik u Risaw kin dei tang ki doh lieh nong South Africa bad kiwei pat ki nongshah lehbein be-aiñ ne bym hok ha la ki jong ki jong ki ri, ong ka jingthoh jong ka White House.
U President Donald Trump ha ka jingshisha u la pynsangeh ïa ka jingwan ki phetwir hadien ba u la shimti ïa ka shuki ha u bnai Jymmang, hynrei u la leh kyrpang ïa ki nong South Africa kiba lieh watla ka Pretoria ka kyntu ba kim ïakynduh ïa ka jingshah pynshitom beiñ ha la ka jong ka ri.
Ka kynhun ba nyngkong eh kaba don kumba 50 ngut ki nong Afrikan, ki khun ki ksiew jong ki nong Europe ba nyngkong eh kiba wan buhai shnong ha South Africa, ki la leit poi buhai shnong biang sha ri America ha u bnai Jymmang.
U Trump u la ïalap elekshon na ka bynta ka White House halor ka jingkular ban beh noh da ki million ngut ki nongwan buhai shnong khlem kot don sla bad u la soi ïa ka hukum treikam ha u bnai Kyllalyngkot ban pynsangeh noh ïa ka prokram pdiang ïa ki nongphetwir jong ka US.
U Aaron Reichlin-Melnick, uba dei u senior fellow jong ka American Immigration Council, ula iathuh ba naduh u snem 1980, palat ar million ngut ki briew, kiba phet na ka jingshah pynshitom bein, ki la shah pdiang hapoh ka ri America, hapoh katei ka prokram.
