Shillong, Risaw 31
Ka Sorkar Jylla ka la pynbna ba ïa ki prokram ai jinghikai ban ïada ïalade na ka bynta ki khynnah kynthei yn sa sdang pyntreikam ha ki skul ha kylleng ki jaka nongkyndong bad jaka sor jong ka Jylla.
Haba pynbna ïa kane ha ka Sngi Thohdieng, u Adviser ka tnad Social Welfare, Bah Paul Lyngdoh u la ong, “Ki prokram ai jinghikai ban ïada ïalade na ka bynta ki khynnah kynthei yn sa pyntreikam ha ki skul ha ki jaka nongkyndong bad jaka sor ha ka rukom ‘Mission Mode’ bad kan don ka jingïatreilang bad ka tnad pulit lem bad ka tnad ki kam ïalehkai.”
Ha kajuh ka por, u la ong ba ka Sorkar kan sa wanrah ïa 4 tylli ki ‘Working Women Hostel’ ha Shillong, Jowai, Ri-Bhoi, bad Tura. Kine ki ‘Hostel’ ki thmu ban pynbiang ïa ka jaka kaba shngaiñ bad kaba ai jingkyrshan ïa ki kynthei kiba trei ha ki kam bapher-bapher.
Ka tnad ka la pyllait ruh ïa u ‘Helpline’ ba kyrpang u ban treikam 24 kynta – ‘181’, na ka bynta ki kynthei kiba mad ïa ka jingshah thombor ha ki ïing ki sem, bad kiwei-kiwei ki jingeh.
“Na ka bynta ki kynthei bad ki jingeh jong ka jingshah thombor ha ki ïing ki sem bad kiwei-kiwei, ngi kwah lyngba ki lad pathai khubor ban ïasam ba ka don ka lad jingïarap ba kyrpang, ha ka dur jong u nombor ‘181’ u ban treikam 24 kynta bad kino-kino ki jingujor ne jingjia ba kyrkieh ba ïadei bad ka jingshah thombor ki kynthei, une u nombar u long uba lah ban ïoh da baroh,” ong u Bah Lyngdoh.
Ka Sorkar kan kyntiew bad shna ruh ïa ki jaka leit-bar ha ki skul ha ryngkat ka jingïatreilang bad ka DRDA bad ka tnad pule-puthi.
Nalor kane, u Adviser u la pynbna ba ïa ki ‘Sanitary Pad’ ba la shna hi (locally), yn sa sam man ka por sha ki khynnah kynthei kiba sdang khie samla ha baroh ki skul, da kaba pynleit jingmut khamtam ha ki jaka nongkyndong.
“Ha ka jingïalang kaba heh kaba khatduh, kaba la khot da ka tnad, ngi la khot ïa ki khynnah skul ban wan ïashim bynta bad ka la don ruh ka jingsam ïa ki ‘Sanitary Pad’ kiba la shna hi, bad ïa kine mynta yn sa leh man ka por. Kane kan kynthup ïa baroh ki skul ha kylleng ka Jylla da kaba pynleit jingmut kyrpang ïa ki khynnah kynthei kiba sdang khie samla bad kan kynthup ruh ïa baroh ki jaka nongkyndong.”
Haba kylli, u Bah Lyngdoh u la ong, “Namar ka jingbym don kine (Sanitary Pad), bun na ki khynnah kynthei ki kiar ban wan sha ki skul, hynrei mynta kumba phi kynmaw, ha ka jingsam ba khatduh ba la pynlong ha Lariti, ngi la sam ïa kine bad kumjuh ïa ka jingïalang baroh kawei la ring dur da ka jingthmu ban pynpaw ba naduh mynta ka sngi ngin kynthup ïa ka Jylla baroh kawei.”
Shuh shuh ka tnad kan lum thup ïa ki jingkren jong ki nongïoh jingmyntoi na u ‘181 Women Helpline’, ban thied ïa ki kali na ka bynta une u ‘Helpline’, bad ban pyndep ïa ka jingker pud na ka bynta ki One Stop Centre (OSC) hapoh ka por ba la buh.
“Ka jingpynkhreh ïa ki jingkren jong ki kynthei kiba ïoh jingmyntoi na u ‘181 Helpline’ – kine ki dei ki kynthei kiba la ïoh jingmyntoi lyngba ka jingïarap jong ngi ha ka por kaba biang bad ngin sa buh jingthoh ïa ki jingkren jong ki khnang ban nang pynsaphriang shuh-shuh ïa ka jingpynsngewthuh halor kane ka lad jingshakri. Ïa kane yn pynurlong hapoh ka jingai por kaba lai bnai,” u la bynrap.
