Shillong, Risaw 31
U Myntri Rangbah ka Jylla u Conrad K Sangma u la pyntip ba ka Sorkar Jylla kan sa siew lypa noh ïa ka ‘Scholarship’ jong ki khynnah pule na ka pla tyngka jong ka Sorkar Jylla namar ka jingpoi slem ka pisa ba phah da ka Sorkar Pdeng.
Ïa kane u Conrad u pynpaw ha ka jingïalang plie ïa ka Government College of Engineering ha Mawlai Kynton Massar kaba long ha ka sngi Thohdieng.
U Conrad u la ïathuh ba ka Sorkar Jylla ka la kyrpad ïa ka Sorkar India ban pyllait kloi ïa ka ‘Scholarship’ na ka bynta ki khynnah pule, hynrei namar ka jingslem ka Sorkar Pdeng ban pyllait ïa ka pisa, ka Sorkar Jylla ka la pan jingbit na ka Sorkar Pdeng, ba kan dang pyllait lypa ïa ka ‘Scholarship’ na ka pla jong ka Sorkar Jylla bad ïa ka pisa ba yn pyllait da ka Sorkar Pdeng kan pyndonkam noh ka Sorkar Jylla ha kano kano ka por ba kan pyllait ka Sorkar Pdeng.
U Conrad u la ong, ba ka ‘Scholarship’ ka long ka bynta ba hakhmat eh jong ka Sorkar, ba ki samla pule kiba wan na ka longïing ba duna ha ka ïoh ka kot kiba mad ka jingjynjar namar ba poi slem ka pisa, kumta ka Sorkar Jylla ka la rai ban ym ap shuh ïa ka pisa ban sa pyllait da ka Sorkar Pdeng, hynrei ba kan sa pyllait hi noh da ka pisa ka Sorkar Jylla ha shuwa ka jingrakhe ïa ka Khristmas.
U la pynthikna ruh ba ïa ka ‘Scholarship’ kumjuh ruh ïa ka ‘CM Scholarship’ ka Sorkar kan pyllait ha shuwa ka jingrakhe ïa ka Khristmas.
