Shillong, Naiwieng 02
Kiba haïing hasem jong i heprit Insaphira Lyngdoh Mawnai iba dang saw snem ka rta kiba shong ba sah ha Nongrah Nonglum Brei, Shillong kin hap ban ap biang ïa ka kaiphot na ki pulit haduh khyndai phew sngi namar mynta ki dang pynlong ka jingtohkit.
Haba ïakren bad u Bah Gowel Lyngdoh Mawphlang uba dei u kpa jong i Insaphira Lyngdoh Mawnai, u la ïathuh ba kiba haïing kin dang ap ïa ka kaiphot na ki pulit haduh khyndaiphew sngi lada kheiñ naduh ba lap ïa ka metïap i Insaphira.
U la ïathuh ba kiba haïing hasem kim pat kwah ban ong eiei namar ki pulit ki la wan ïathuh ba kin sa ai ïa ka kaiphot hadien ka khyndaiphew sngi.
Ka jingïakren U Nongsaiñ Hima lyngba ka phone ïa u kpa ka dei ban buddien namar kim shym la sngewhun ïa ka jingjubab u khynnah ba dang 13 snem hakhmat ki pulit ban poi ka jingshah pynïap Insaphira tang namar ba ïaknieh biskit.
U Bah Gowel u la pyntip ha kito ki por ba ka Kur Lyngdoh Mawnai kan sa shong pyrkhat ban ïaid shakhmat na bynta ban ïoh ïa ka jingbishar kaba hok ïa ka jingshah pynïap i Insaphira.
Lada kheiñ naduh ba lap ïa ka metïap jong i Insaphira kaba dei ha ka 15 tarik Nailur, 2025 haduh mynta ka sngi ka 2 tarik Naiwieng ka la long shi bnai shiteng hynrei kiba haïing kin dang ap biang sa shi bnai shiteng ban dap ka 90 sngi ban ïoh biang ïa ka kaiphot na ki pulit.
Kum ban shu pynkynmaw, i Insaphira Lyngdoh Mawnai i la jah na ïingsah ha ka por 8:15 baje mynstep jong ka 14 tarik Nailur, 2025 ha Nongrah Nonglum Brei hynrei la lap ïa ka metïap ha ka sngi ba bud kaba dei ka 15 tarik Nailur ha kawei ka ïing ba dang shna thymmai kaba jngai kumba 100 metre.
