Shillong, Naiwieng 02
Ka Congress kaba dang ïaleh ban khie khlieh biang ïalade hapoh ka Meghalaya, ka la nangïoh mynsiem hadien ba u MDC barim ka NPP ha Garo Hills Autonomous District Council (GHADC) u Brilliant R Sangma, u la pynïasoh noh ïa lade sha ka Congress ha ka taïew ba la lah.
Haba pdiang burom ïa u Brilliant R Sangma sha ka sem jong ka seng, ka Working President ka MPCC ka Deborah C Marak ka la pynpaw ba ki nongïalam ka jylla kiba don ka jingthmu bad kwah ban ïakhun pyrshah ïa ka kam bamsap ki la sdang ban wan phai sha ka sem jong ka Congress.
“Ngi dang khmih lynti ba kin sa don shuh shuh ki nongïalam ki ban pynïasoh lane ban wan phai biang sha ka seng,” la ong ka Deborah, kaba dei ruh ka MLA barim.
Shuh shuh ka Deborah ka la kdew ba kiba bun ki nongïalam hapoh ka jylla ki la ngiah ïa ka National People’s Party kaba lamkhmat ïa ka Sorkar halor ka jingbym lah ban wanrah ka synshar khadar kaba hok bad kumta, ki la kwah ban rung noh sha ka Congress ban ïakhun pyrshah ïa ka kam bamsap hapoh Meghalaya.
