Shillong, Naiwieng 02
U Bah Lionel Nongkhlaw uba dei u kyrtong shimet ha ka ilekshon MDC kaba la dep na Mylliem Konstitwensi u la ïathuh ba u la rung sha ka Congress ka dei hadien ba ki paidbah kiba ju kyrshan ïa u ki la ai jingmut naduh ba la mih noh u Bah Ronnie V Lyngdoh, MLA ba mynta ban leit rung sha ka NPP.
U la ïathuh ba ki paidbah ki la ai jingmut ban rung sha ka Congress ka dei ka seng kaba ïada ïa ki ritpaid, ki kristan, ka riti dustur bad ban ïoh ka jingmane laitluid.
U la ong, ka Congress ka dei ka seng ba ïarap ïa u kup shilliang bad sem shiliang kaba ïada ïa ka riti synshar.
“Nga rung sha ka Congress ka long ban ïakhun ïa ka ilekshon MLA ha u 2028 na ka tiket Congress na Mylliem Konstitwensi hadien ba la pynbeit bad u Bah Banphira Basaiawmoit,” u la ong.
U la ïathuh ba hadien ba u Bah Banphira um nym treh ban ïakhun ïa ka ilekshon MLA kumta u la rai ban rung sha ka Congress ban dang pynkhlaiñ shuh shuh ïa kane ka seng.
U la ong biang ba ka jingkam u Bah RV Lyngdoh ba ki nongkyrshan Congress ki la mih lut ka long kaba bakla namar ki paidbah ki dang ieid ïa ka Congress ha Mylliem bad hapoh ka jylla.
U la ban biang ba naduh ba mih u Bah RV Lyngdoh na ka Congress, ki nongkyrshan ki la sah khunswet hynrei ma u pat un long u nongai mynsiem.
