Shillong, Naiwieng 02
Namar ka jingïa kynduh ha kiba bun ki jingeh jong ki skul ha ka shnong Mawlai, ka la pynlong ïa ka Seng Samla Mawlai Pyllun (SSMP) ban noh synñiang da ka pisa sha ki 6 tylli ki slul ha Mawlai.
Ka Seng Samla Mawlai Pyllun (SSMP) ka la noh synñiang mar T.15 hajar.
Ki skul kiba ka SSMP ka la noh synñiang, ki kynthup ïa ka Mawroh Secondary School, St.Aloysius, Grace Care Academy, Mount Carmel, Shining Light Academy, bad Christ Church Secondary School, kaba la long ha Mawlai Nongpdeng.
Ha katei ka sngi la ïadon lang u Secretary ka Mawlai Nongpdeng, President bad Secretary ka Seng Kynthei Mawlai Pyllun, ki nonghikai, ki khynnah skul, ka Seng Samla Mawlai Pyllun bad kiwei kiwei de.
Haba kren ha katei ka sngi, u Bah Samuel Biam, President ka SSMP u la ong ba kum ka kynhun ngi ai ka jingkyrshan na ka bynta baroh ki nongshong shnong ka Mawlai bad ban kyntiew ïa ki samla ha ki bynta bapher bapher, da kaba ong ruh ba lada ngim lah da ka bor pisa hynrei ka bor met ngi don.
“Ki khynnah ruh haba ki don kano-kano ka jingeh, ka SSMP ka long ba la kloi ban ïa tynrong lem ha ka khia ka shon kiba ki ïa kynduh,” u la ong.
U la ïathuh ruh ba ha kine ki khyndiat sngi ba la don i wei i samla i ba leit lehkai shabar bad i la pyntip ba i dang don ha lynti ban wanphai sha ka Jylla, ha kaba i la wanrah ruh ïa ka nam ban khur ïa ka Silver. “Ia kane ruh na ka liang ka Seng Samla Mawlai Pyllun kan sa leit ban ai mynsiem,” u la bynrap.
Nalor kata, u la kyntu ïa baroh ki khynnah ba kin trei shitom, leh ïa kaba bha tam bad khamtam eh ka akor ka burom na ka bynta ka imlang ka sahlang bad na bynta ka iing ka sem.
Ha katei hi kajuh ka sngi ka Ka Seng Samla Mawlai Pyllun (SSMP) ka la pynkup burom ruh ïa ka samla Babun Nongrum, ka nongjop ha ka kyrdan ba ar jong ka Mrs.Earth India 2025.
Na ka liang ka samla Bahun Nongrum pat haba kren ha katei ka sngi, ka la ai ka jingkyntu ïa ki khynnah skul baroh ba ki dei ban don ka mynsiem jong ka jingiai shah bad ban ieid ïa u Blei, khnang ban poi sha ka thong.
Ka la ai khublei ïa ka SSMP ba ka la pynkup burom halor ka jingjop jong ka, ha ka Mrs.Earth India 2025.
