Mexico, Naiwieng:
Katkum ki khubor la ong ba ka jingbthei ha katei ka jaka iew, ka la wanrah ia ka jingiap jong ki 23 ngut ki briew, ha ka thaiñ Mihngi jong ka Mexico ha ka Sngi Saitjaiñ, hynrei la shu iathuh ba katei ka jingbthei ka dei ka jingjia ryngkhat ba khlem poi pyrkhat, kaba lah ban dei na ka jingthut jong u ‘Transformer’.
Hynrei kaba sngewsih ka long ba katto- katne ngut napdeng kitei kiba khlad, ki dei kiba dang rit ka rta, la ong u Lat ka nongbah, u Alfonso Durazo.
U Gustavo Salas, u nongmudui jong ka nongbah, u la ong ba kiba bun na kitei kiba khlad, ki dei kiba khlad na ki jingshitom pynhiar mynsiem namar ka jingioh ring ia ka lyer bih kaba mih na katei ka jingbthei.
U la pynthikna ha ka video ba la pyllait da ka ophis jong u, ba kiba iap ki kynthup ia ki katto- katne ki khynnah rit, hynrei um shym la batai bniah pat namar ba ka jing pyn-ithuh ia ki met iap ka dang iaid shakhmat.
U Salas u la pyntip ba ki don 12 ngut kiba mynsaw, kiba la pynkit sha ki jakasumar bapher jong ka nongbah Hermosillo.
U Durazo u la pyntip ruh ba u la bthah ia ki tnat ba dei khmih, ba kin pynlong da ka jingtohkit kaba kham kyrpang bad kaba bniah ban lap ia ki daw jong katei ka jingjia bad ban wad ia kiba donkti baroh.
Ha ka jingpynbna ka ophis jong u nongmudui, la ong ba ka jingmut kaba treikam ka long ba katei ka jingjia ka dei kaba shu jia ryngkhat, bad ka jingtohkit ka dang wad bniah ia ki jingthud bad jinglong- jingman jong utei u kor ‘transformer’ uba don hapoh katei ka jaka.
U Salas hadien u la ong ba kam don kano- kano ka jingpynpaw ba kane ka dei ka jingleh khnang ne kaba la thmu da mano re mano, hynrei kin ym leh sting bad kin dang pyniaid ia ka jingtohkit kaba bniah haba iadei bad katei ka jingjia.
Kane ka jingbthei ka la jia ha kawei ka dukan Waldo kaba don ha pdeng ka phang sor.
Ka jingpynbna ba la pyllait ha ki rynsan ‘ocial Media’ jong ka seng heh, ka la pynpaw ïa ka jingsngewsih kaba khraw halor ki jingim kiba la duh, bad ka la kular ban trei da ka jingshai bad ka jingkitkhlieh bad ki bor synshar ban tohkit ïa kaei kaba la jia ha katei ka sngi.
