Mawkyrwat, Naiwieng 02
Ka Federation of Khasi Jaiñtia & Garo People (FKJGP) Mawkyrwat Circle ka la plie pyrda ïa ka lympung ïalehkai phutbol ba la tip da ka 1st Invitation Knockout Football Tournament 2025 halor ka phang “Say no to Drugs Yes to Football’ ha ka sngi Saitjaiñ ha kaba u Bah D. Kharjana, Additional Superintendent of Police, South West Khasi Hills District u la long kum u kongsan.
Ha katei ka sngi sdang, ka jingïalehkai ka la long hapdeng ka Wahlang FC pyrshah ïa ka Nonghahlait FC ha kaba ka Nonghahlait ka la khur ïa ka jingjop.
Ha kane ka jingïalehkai baroh ar ki kynhun ki la pyrshang ban ïalehkai ba naduh kaba sdang ha kaba ki la ïoh ban thep mar shi kol ha ka kylla step bad kylla miet. Haduh kaba kut ka jingïalehkai kitei ki kynhun ki la ïakhaid mar 1-1 ko. Te kumta ha ka jingïashut ïa ka tie-breaker, ka Nonghahlait ka la lah ban thep 3-2 kol na ka bynta ban khur syndon ïa ka jingjop.
Ha katei ka sngi la ïadoh lang u Bah Kenesjune L.Nonglait, President FKJGP SWKHD, Bah Tensing L .Nonglait, President FKJGP Mawkyrwat Circle Bah Enborsing Syiemïong Secretary Bah Tebarsing Lyngkhoi, Sports Secretary bad kiwei kiwei.
