Shillong, Naiwieng 02
Ka lympung ïalehkai 4th North East Masters Table Tennis Tournament 2025 kaba lai sngi ka la long ha Pasighat.
Ha kane ka lympung ka Meghalaya ka la phah 15 ngut ki nongïalehkai hapoh ka jingïalam u Sudesh Pradhan kum u manager jong kane ka kynhun.
Ha ka kyrdan ïalehkai jong kiba 60 snem shaneng, ki nongïalehkai ka Meghalaya ki kynthup ïa u Santanu Ghosh, Harendra Singha, Arup Nag bad Surjya Pyngrope, kiba la khur ïa ki takma rnong.
Ki ar ngut ki nongïalehkai ka Jylla u Santanu Ghosh bad u Arup Nag ki la khur ïa ka takma rnong ha ka kyrdan ïalehkai doubles jong kiba la 60 snem shaneng.
U Bah Kynshanborlang Ranee u la shim bynta ha kane ka lympung ha ka sien kaba nyngkong eh bad u la khur ïa ka takma rupa ha ka doubles jong kiba la 50 snem shaneng ryngkat bad u Sarwan Gareri bad u la khur ruh ïa ka takma rnong ha ka jingïalehkai single jong kajuh ka kyrdan ïalehkai. U bah Ranee u dei ruh u rangïalehkai barim jong ka Jylla.
Ha kawei pat ka liang, ka Arunachal Pradesh ka la lah ban khur takma ha ka kyrdan ïalehkai kiba la 60 snem shaneng ha ka sien kaba nyngkong eh. Ïa ka nam lahduh jong kiba la 40 snem shaneng la khur da u Kaushik Phukan jong ka Assam, katba u Mita Sinha Roy u la khur ïa ka takma ksiar ha ka sien kaba nyngkong eh jong ka kyrdan ïakhun kiba la 50 snem shaneng. U Carfew Roy, uba la don bynta hapoh ka kynhun ïalehkai ka ri ha ki por kiba la leit, u la ïashim bynta ha ka kyrdan ïalehkai jong kiba la 60 snem shaneng mynta u snem.
