Shillong, Naiwieng 02
Ka Liverpool ka la lah ban pynliem ïa ka Aston Villa da 2-0 kol ha ka Premier League bad pynkut noh ïa ka jingshah rem ba saw sien lynter jong ka.
Kane ka la wan urlong lyngba u Mohamed Salah uba la thep ïa ka kol kaba 250 na ka bynta kane ka klob, bad ïa kawei pat la pynbud da u Ryan Graven -berch na ka bynta katei ka lahduh jong ka aïom ba la lah bad ban kynjoh mynta sha ka kyrdan balai.
“Nga sngewkmen ba ngi la wanphai biang sha ka lynti kaba dei mynta. Ka dei ka samoi kaba jynjar bha na ka bynta jong ngi namar ngi don katto katne ngut ki nongïalehkai kiba thymmai, ki long kiba tbit bha, hynrei ki donkam ïa ka por ban pynïahap ïalade. Ngi la duh noh ïa ki katto katne ki nongïalehkai ruh. Ka shim por ban pynïahap bad ka kynhun bad ban tip ïa ki jingïalehkai jong uwei pa uwei, hynrei baroh kin sa long kiba biang,” la ong u Salah.
Ka rai jong u manager ka Liverpool, u Arne Slot, ka long ban ban pynkylla bunsien ha ka jingïalehkai jong ka League Cup ha kaba ka la shah rem da 3-0 kol ha ka Crystal Palace ha ka sngi Balang, kaba la pynjur ïa ki nongïalehkai ban pynthikna ïa ka jingjop, hadien ba ki la shah rem hynriew sien na ki hynñiew sien ïakhun jong baroh ki jingïakhun.
“Kaei kaba nga sngewtynnad eh ka long ba nga pyrkhat ba baroh hangne ki sngew ïa ka jingdonkam jong ka jingïalehkai. Nga kren shaphang ki nongïalehkai jong nga bad nga kren shaphang ki nongkyrshan. Naduh kaba sdang haduh kaba kut ki nongïalehkai ki la pyni ïalade,” la ong u Slot.
Ka Liverpool ka la mad ïa ka jingeh haba u Morgan Rogers u la ïoh ban shut ha kaba ka la leit dei na diengkol ha ka mint kaba san. Kane ka la bteng ïa ka rukom ïakhun jong ki ha ki 15 minit, kaba la paw shai ha ki saw tylli ki jingshah rem ha ka Premier League jong ki jingïalehkai ba la lah.
Ha kaba sdang ka Villa ka la pyrshang ban ïalehkai bha ban buh jingma ïa ki rangïalehkai ‘dien ka Liverpool, hynrei hadien ka la lah ban khanglad na ka jingshah thep. U Dominik Szoboszlai u la pynlehnohei ïa kawei ka kabu ksiar hadien ba u la ïoh ïa ka bol na u Pau Torres, da kaba shut beit sha u Martinez.
Lyngba katei ka jingjop, ka Liverpool kan pynkhreh ïa ki jingïakhun ki ban wan pyrshah ïa ka Real Madrid ha ka Champions League bad ïa ka Manchester City ha ka Premier League.
Ha kawei pat ka jingïakhun, ka shi kol ba la thep da u Joao Pedro ka la biang pura ïa ka Chelsea ban pynliem noh ïa ka Tottenham da 1-0 kol.
