Shillong, Naiwieng 02
Ka jingpynthud u slap ka la pynlong biang ïa ka Meghalaya ban duh ïalehkai ha ka lympung ïalehkai U-23 men’s Col CK Nayudu Trophy ha Shillong bad kumjuh ha Patna na ka bynta ka Ranji Trophy.
Ha ka jingshisha mynta ka sngi ka Meghalaya ka la dei ban sdang ïa ka jingïalehkai ha ka Col CK Nayudu Trophy Elite Group pyrshah ïa ka Goa ha madan MCA. Hynrei na ka daw ka jingther jong u slap baroh shimiet ka la pynlong ïa ka madan ïalehkai ba kan ym long shuh ban ïalehkai.
Ha kawei pat ka liang ha Patna, kane ka sngi kan dei ka jingïalehkai kaba ar jong ka Meghalaya ha ka Ranji Trophy (plate group) pyrshah ïa ka Bihar, hynrei ym shym la lah ban pynlong.
Tang kawei ka jingïalehkai ba ka Meghalaya ba ka la ïoh ïashim bynta ha ka U-19 Women’s T20 Trophy (plate group), ha kaba ka Mizoram ka la khur ïa ka jingjop da 6 wiket ha Lucknow. Ka Meghalaya ka la buh ïa ka thong da kaba kamai 50/9 ha ki 20 over, hynrei ka Mizoram ka la lah ban kynjoh sha ka thong bad shah pynhap 4 wiket ha ki 12.4 over.
Te kumta ka Meghalaya ka la wan ha ka kyrdan basan ha kaba la jop tang shisien pyrshah ïa ka Arunachal Pradesh bad shah rem lai sien. Kane ka kynhun ka la long kaba sniew bok ha ka jingïakhun pyrshah ïa ka Nagaland ha kine ki ar sngi ba la lah ha kaba la shah pynthud ha u slap. Te kumta ka Nagaland ka la shah rem baroh saw sien bad lada ka Meghalaya ka la lah ban khur jingjop, kan jin da la kiew sha ka kyrdan saw.
