Amlarem, Naiwieng 02
Ka shnong Lamin kaba hap hapoh ka Amlarem Sub Division, West Jaiñtia Hills District kala pyndep ïa ka lehniam ‘Ron Shondi’ ha ka jaka lehniam kaba don ha ïew Bakur ha ka 1 tarik Naiwieng.
Ïa kane ka lehniam la pyndep da u Waheh Shnong Lamin Bah Golden Gashnga uba la ainguh aidem da ki lai tylli ki syiar bad uwei u blang bad katkum ki dak ki shin kiba paw ka lehniam ka long kaba bha ba miat.
Haba ïakren bad u Waheh Shnong ka Lamin Bah Golden Gashnga, u la ïathuh ba kane ka lehniam ka long shibynta ban ïada ïa ka ïew ka hat, ki jaka puta na ki nongshun nongpynjulor bad ruh shibynta ban duwai phirat na ka bynta ban bha ban miat ka kamai kajih jong ki nongshong-ïew shong-hat kumjuh ki nongthied nongpet, ban lait na kino kino ki jingmynsaw khamtam ban ïoh ïa ka koit ka khiah ha baroh shi snem lynter.
U la ïathuh ruh ba ki Kur kiba lah ban ïa shim bynta ha kane ka jinglehniam ki dei ki Kur kiba hap hapoh ka ‘Lamin Lapoh’ kiba kynthup ïa ka Kur Gayang, Gassah bad Gashnga.
Ha kane ka jinglehniam la wan ban sakhi lang ruh da u Dolloi ka Elaka Nongtalang Bah Chui Pohlynjar, ryngkat ki lai ngut ki Myntri kiba hap hapoh ka Seinraij Lamin Lapoh kiba kynthup ïa u Bah Ranjan Lamin na ka Kur Gayang, Bah Fourly Gassah bad Bah Wanlam Gashnga nalor kiwei kiwei de ki riew rangbah.
U Adviser ka Lamin u Bah Omin Pohlong u la ong, ka jingpynlong ïa kane ka lehniam ka long ban ïada na kino kino ki jingeh jingshitom namar katkum ka jingngeit jong kiba dang bat ha ka niam barim, la ong ba ka jinglah ban kñia ‘Ron Shondi’ ka lah ban ïada ha kiba bun ki bynta jong ka jingïaid lynti ha ka jingim.
Haba ïadei bad ka ïew Bakur u Bah Omin Pohlong u la ong ba la sdang naduh u snem 1934 ha ka por ka jingsynshar ki phareng bad naduh katei ka por la pynïaid bad dei trai da ka ‘Lamin Lapoh’ kiba dei ki Lai Kur kiba la ai jaka sngewbha sha ka shnong Lamin ba kan seng ïa kane ka ïew Bakur kaba dei kawei na ki ïew ba pawnam ha ki thaiñ khappud bad pynmyntoi shi katdei eh ïa ki nongshong ïew bad nongwan ïew wan hat.
Hadien ba la pyndep ïa ka lehniam, ki khun samla ka shnong Lamin kynthei bad shynrang kila shim bynta ha ka jingshad Rong-Kusi, kaba dei ka jingshad kmen jong ki nong War Jaiñtia ban ainguh ïa U Blei Trai Kynrad halor ki jingkyrkhu ba u la theh sei kynthup naduh ka koit ka khiah, ka rep ka riang, ka kamai kajih, ka roi ka par nalor kiwei kiwei.
Katba ha ka por janmiet kala don biang ka lehniam shwa ban ïashim bynta ki nongshong shnong ha ka jingïa bamja sngewbha.
