Shillong, Naiwieng 02
Ka Mathrika Choudhury ka la jop ïa ka nam Miss Shillong 2025, ha ka janmiet sngi Saitjaiñ kaba la pynlong ha u Soso Tham Auditorium, Shillong
Hadien ka jingïakop Miss Shillong ha kaba ki nongïashim bynta ki don haduh 19 ngut, ka Mathrika ka la rah ïa nam jop ba donburom ïa ka Miss Shillong 2025 ryngkat bad ka song pisa ba T.1 lak, ba la pynlong da ka Fashion Society Shillong (FSS).
Kumjuh ruh, ka Wandaphi Kharbamon ka la ïoh ïa ka nam jop ha ka kyrdan ba nyngkong, ryngkat bad ka song pisa ba T.75 hajar, ka Jollyne Ancie Lyngdoh ka la jop ha ka kyrdan ba-ar ryngkat ka song pisa ba T.50 hajar. Ka Nimrat Ranhotra ka la ïoh ïa ka nam ba lai bad ka Rimika Shylla ka la ïoh ïa ka nam ba saw.
Ki san ngut ki nongïakop ba ha khlieh ki la ïa kynduh ïa ki jingkylli ba eh kiba ïarap ïa ki nongbishar ban jied ïa ki lai ngut ki finalist na ka bynta ka Miss Shillong.
Nalor kata, la sam ruh ïa ki kyrdan ba kyrpang ha katei ka jingïakop. Ka Jollyne Ancie Lyngdoh ka la ïoh ruh ïa ka nam Viewer’s Choice title ba la jied lyngba ka jingthep vote ha ka wensite jong ka ‘The Shillong Times’ ïa kaba la aiti da ka Shobha Chadhuri ka Nongthoh khubor jong ka ‘The Shillong Times’, katba ka Rimika Shylla ka la rah ïa ka nam Viewer’s Choice ha ka website jong ka kot khubor Khasi ‘Mawphor’.
Kiwei pat ki khusnam ki kynthup ïa ka Miss Alluring Smile, kaba la rah da ka Niha Hajong, Miss Talented ka Wandaphi Kharbamon, Miss Sparkling Eyes ïa ka Isadelia Bareh bad Best Recycle Outfit sha ka Bashika Warlaitthma. Kumjuh ruh ka Miss Tantalizing Tresses ka la leit sha ka Elizabeth Lyngdoh bad ka Miss Silky Skin sha ka Agnes Lyngdoh.
Ka jingïakob ka la ïalam ïa ki nongïashim bynta ha ka jingïaid lynti lyngba saw tylli ki jingïakop kiba sngewtynnad-ka jingpynpaw ïalade, ka jingpynkylla ïa ka jingpyndonkam biang, ka jingpyn ithuh ïalade, ka jingpynpaw ïa ka jingpynkylla ïalade, bad ka jingdeng kaba itynnad bha-ha kaba baroh ki la pyni ïa ki riam ba itynnad, ka jinglong jemnud bad ka jingstad jong ki, da kaba pynhun ïa ki nongpeitkai bad ki nongbishar ruh kumjuh.
Ki riew donburom kiba la don lang ha katei ka sngi, ki kynthup ïa u nongaibuit jong ka tnad Social Welfare ka Sorkar Jylla, u Bah Paul Lyngdoh, Principal & Secretary ka Arts and Culture, u Bah Frederick R. Kharkongor, bad u President ka FSS, u Bah Adlous Mawlong.
Ha katei ka sngi la don 5 ngut ki nongbishar, ba kynthup u Nitin Khera, ka Evarihun Warjri, u Michelle Syiemlieh, u Trebok Talang bad ka Esha Chaudhuri.
