Shillong, Naiwieng 02
Ka Mawlai SC ka la lah ban pynthikna ban jam sha ka semi final ha ka lumpung ïalehkai Super Cup jong ka Shillong Sports Association, hadien ba ka la lah ban pynliem noh ïa ka Sawmer SC lyngba ka tie-breaker da 5-4 kol ha ka sngi Saitjaiñ ha SSA Stadium kaba ha First Ground, Polo.
Haduh kaba kut ki 90 minit kine ki kynhun ki la ïakhaid mar 2-2 kol bad wat haduh kaba kut ki jingïakhun jong ka ‘extra time’ ki la ïakhaid biang da mar 3-3 kol.
Ha kane ka jingïakhun, la sakhi ba ka Sawmer kam shym la ailad ban shah rem suk ha ka Mawlai kumba ka la jop ha ka jingïalehkai jong ka Shillong Premier League.
Haba phai sha kane ka jingïakhun, dei ka Samer ba ar-sien ar-wat ka la lah ba kan tam kylla shakhmat ïa ka Mawlai, ïa kaba ka rai mano napdeng kine ki ar kynhun ban jam sha ka semi final, la hap ban rai da ka tie-breaker, hadien ba ka pali kaba la wan ban shut da u Orestar Sad, la lah ban kyrda ïa ka da u rangapkol ka Mawlai u Damanbha Rymbai, kaba hangne ka plie lad hi war ïa ka Mawlai ban jop ïa kane ka jingïakhun bad jam sha ka semi final.
Ka jingïathep kol hapdeng kine ki ar kynhun ka long shwa mar shi kol ha kaba kut ka kylla step, mar ar kol haduh ba kut ki 90 minit bad mar 3 kol ha kaba kut jong ka ‘extra time’.
U Bickyson Kharkongor (10) bad Diego Khyriem (90+2 & 96) ki long ki nongïalehkai ba la thep na ka bynta ka Sawmer, katba u Robertson Khongriah (20), Banraplang Pyngrope (53) bad u Mewan Rasmut (97) ki la thep ia ki kol na ka bynta ka Mawlai.
Kumban shu pynkynmaw ba ha ka por ka jingïakhun jong ka SPL mynta ka samoi, dei ka Mawlai kaba la lah ban pynliem ïa ka Sawmer da 6-2 kol, kaba ha ka sngi Saitjaiñ, sa shisien marsien sdang ka jingïakhun, la ïohi ïa ka jingïakhun dohïap na kine ki ar kynhun bad khamtam eh ka Sawmer.
Hadien kane u Banman Roy Nongsiej ka Sawmer u la hap ban mih noh shabar ka madan hadien ba u la ïohpdiang da artylli ki yellow card, ïa kaba kam shym la don satia kano kano ka jingktah ïa ka kynhun hi baroh kawei.
Hadien ba la rah sha ka tie-breaker, na ka liang ka u Bah Arki Mylliemulong u la rai ban bujli noh ïa u nongapkol da kaba pynrung noh da u Jeffrey Jyrwa ha ka jaka u Edison, hynrei na ka liang ka Mawlai, ka la bynshet beit ïa kane ka kam ha u Damangbha, kaba bunsien u la shah pynshong ben ha ki jingïakhun SPL, bad dei tad ha ka sngi Saitjaiñ ba u la ïoh ban ap kol, ïa kaba ula pyndonkam hok ïa kane ka kabu kaba u ïoh ban ïada kylla ïa kawei ha ka tie-breaker ba la shut da u Orestar.
Te kumta u Banraplang uba la thep ar kol ha kane ka jingïakhun u la ïohpdiang ïa ka khusnam kaba long 5 hajar tyngka lyngba ka t7 Player of the Match ba la sam da u President ka SSA u Bah Banteidor Lyngdoh.
Lyngba kane ka jingjop ka Mawlai kan pynkhreh ban ïakhun semi final pyrshah ïa ka Shillong Lajong FC ha ka 8 tarik, katba ka Rangdajied ïa ka Langsning FC ha ka 7 tarik mynta u bnai bad kine ki jingïakhun kin long ha ka por 5 baje janmiet.
